Namminersorlutik Oqartussat allaffeqarfimmik nutaamik pilersitsissapput
Tamatunnga atatillugu tusagassiortut ullaaq-manna nalunaaqutaq arfineq-pingasunut qaaqquneqarput, qaaqqusissummi allassimaneratut, imeruersaatinik eqiiallannartunik sassaalliisoqassalluni, aamma aqutsisoqarfiup sulisui ataasiakkaarlugit oqaloqatigipallalaarneqarsinnaassallutik.
Tassa peqataasut piffissami sivikitsumi qarasaasiat atorlugit imminnut ilisaritissapput. Ullaarnganiillu taama naapinnissamut kikkut piumassuseqassanersut paasinarsiumaarpoq.
Tusagassiortut saniatigut Digitalimik sullissinermik takorluukkat saqqummiunnissaannut immikkut ittunik qaaqqusisoqarpoq, ilaatigut takkutissallutik Tele Greenlandimi pisortaaneq, Michael Binzer, aamma Aningaasaqarnermut Nunamullu Namminermut Naalakkersuisoq, Vittus Qujaukitsoq, politikkikkut Digitalimik Sullissinermut Aqutsisoqarfimmut akisussaasuusoq, taanna Qeqertarsuup Tunuani angalagami, digitalinngorsaanerup aqqani Skypekkut peqataassaaq. Taannami digitalimik sullissinermut Aqutsisoqarfittaami naalakkersuinikkut akisussaasuuvoq.
Aqutsisoqarfiup nutaap aamma neriuutigaa, ilinniarsimasatigut assigiinngitsunik suliaqartut aamma pisortat ataatsimoorlutik suliffeqarfii imminnut naapippata, Nunatsinni digitalimik sullissineq nukittorsarneqarsinnaasoq.
