461 millionit: Namminersorlutik Oqartussat Air Greenlandimik tamakkiisumik piginnikkusupput

Naalagaaffiup SAS-illu Air Greenlandimik piginneqataassutaat Naalakkersuisut 461 millionit koruunilerlugit pisiarerusuppaat. Sermitsiaq.AG taama allaaserisaqarpoq.

Nuummi Ilulissanilu mittarfinnik tallilerinissamut Naalagaaffiup aningaasaleeqataanissaanik isumaqatigiissut naalakkersuisut siulittaasuata Kim Kielsenip, statsministerillu Lars Løkke Rasmussenip siorna atsioqatigiissutigimmassuk siunertaqaqatigiinnermi ilanngullugu isumaqatigiissutigineqarpoq, Naalagaaffiup Air Greenlandimik piginneqataassutai Namminersorlutik Oqartussanit tiguneqassasut.

Naalagaaffik Air Greenlandimik 25 procentimik piginneqataavoq, SAS-ilu 37,5 procentinik piginneqataalluni. Piginneqataassutillu taakku Naalakkersuisut pisiarerusuppaat.

AAMMA ATUARUK Selvstyret kan købe statens andel af Air Greenland

Sermitsiaq.ag -p paasisai naapertorlugit, Air Greenlandimik piginneqataassutit taakku piginneqataassutit katillugit 62,5 procentiusut 461 millionit koruuninik naleqarput, paasissutissarlu taanna KNR-ip tusarfiup atiminik tunniusserusunngitsup aamma uppernarsarpaa.

KNR-ip paasisai naapertorlugit Naalakkersuisut Air Greenlandimi piginneqataassutit tamaasa ukioq manna tigorusuppai.

Air Greenlandimik piginneqataassutinik pisinissamut pilersaarutit Inatsisartut Aningaasaqarnermut Akileraartarnermullu Ataatsimiititaliaata tallimanngorpat oqaluuserissavai.

Air Greenlandimi piginneqataassutit 37,5 procentii Namminersorlutik Oqartussanit maanna pigineqarput.