Air Greenland aqqutigalugu inniminniisimasut bilitsit allanngortissinnaanngitsut pisiatik atorlugit aasaru angalanissaminnut isumaaluttut, KNR-ip sapaatit akunneri marluk kingulliit ingerlaneranni arlaleriarluni allaatigai.Assi: KNR, Anton Gundersen Lihn

Namminersorlutik Oqartussat Air Greenlandilu bilitsinut akikitsunut akiliutinik utertitsisinnaaneq oqaluuserisimagaat

Namminersorlutik Oqartussat oqarnerat naapertorlugu Air Greenland Danmarkip nunattalu akornanni juunip aallaqqaataaniit juulip ulluisa 15-iata tungaanut sapaatit akunnerannut pingasoriarluni timmisartuussisasssaaq.

Air Greenland innuttaasut Danmarkimut timmisartorlutik angalanissaminnut bilitsinik allanngortissinnaanngitsunik pisisimasut aamma aallarnissaminnut periarfissaqanngitsut piffissamiluunniit qaninnermi aallarusunngitsut kissaataat naapertorlugit periarfissanik misissuivoq.

Namminersorlutik Oqartussat tusagassiorfinnut taama nalunaarput.

Namminersorlutik Oqartussat oqarnerat naapertorlugu Air Greenlandip bilitsit allanngortissinnaanngitsut maajip ulluisa 22-anni nalunaaqutaq 08.00-miit allanngortinneqarsinnaalissasut ilisimatitsissutigaa. 

Air Greenland aqqutigalugu inniminniisimasut bilitsit allanngortissinnaanngitsut pisiatik atorlugit aasaanerani angalanissaminnut ernumasut, KNR-ip sapaatit akunneri marluk kingulliit ingerlaneranni arlaleriarluni allaatigai.

AAMMA ATUARUK Billetsit akikitsut utertitassaanngillat: Air Greenland uumitsannaq

Danmarkip nunattalu akornanni pilersaarutit malillugit juunip aallaqqaataaniit timmisartuusseqqitoqartalissaaq - inuilli coronap ajornartoortitsilinnginnerani akikitsunik bilitsisisimasut aallarnissaminnulluunniit ernumasut - bilitsinut akiliutitik tigoqqissinnaanngilaat.

Bilitsinimmi akikitsunik pisinermut piumasaqaatit taamaapput.

Nalorninerat paasisinnaalluaraat

Tusagassiorfinnulli nalunaarummi allagaq naapertorlugu Namminersorlutik Oqartussat Air Greenland inuit nukillalaarutaat pillugit "oqaloqatigeereerpaat".

Attaveqaqatigiinnermut naalakkersuisoq Karl Frederik Danielsen (S) tusagassiorfinnut ima nalunaarpoq:

- Kisiannili soorunami apeqqut taanna oqaluuseraarput, imarpik qulaallugu timmisartuussinernut bilitsinik akikinnernik utertitsisinnaaneq, maannarpiaq COVID-19-ip atuunnerani pissutsit allaalluinnartut atuunneri peqqutigalugit innuttaasunit amerlasuunit soqutigineqarmat.

AAMMA ATUARUK Partiit billetsit akikinnerit pillugit: Allanngortinneqarsinnaasariaqarput

- Innuttaasut amerlasuut nunarsuarmi pissutsit pillugit nalornissuteqarnerat Air Greenlandilu paasilluarparput. Air Greenlandilu isumaqatigiissuterput Air Greenlandip bilitsit ilaannut piumasaqaatinik allannguinermini aningaasatigut eqqorneqaatissaanik annikillititsisussaavoq.

Nunatta ammaqqinnissaa suli ullulerneqanngilaq. Inatsisartut tamanna marlunngornermi ullaakkut oqallisigissavaat.

AAMMA ATUARUK Nivip billetsini utertissinnaanngilaa: Ilungersunaqaaq

Nunattali ammaqqinnissaanut pilersaarut pingasunik immikkoortoqarpoq. 

Naalakkersuisup Karl Frederik Danielsenip oqarnera naapertorlugu Danmarkip nunattalu akornanni sapaatit akunnerannut pingasoriarluni timmisartuussisoqartassaaq. Tamanna juunip aallaqqaataaniit juulip ulluisa 15-iata tungaanut atuutissaaq. Isumaqatigiissut taanna tamatuma kingorna sivitsorneqarsinnaavoq.

KNR-ip Air Greenland naalakkersuisorlu Karl Frederik Danielsen tamatumunnga atatillugu oqaaseqartinniarsarai.

Isummersuutit