Namminersorlutik Oqartussat Air Greenland pisiaraat

Naalakkersuisut SAS-ip danskillu naalagaaffiata Air Greenlandimi piginneqataassutaata pisiniarinissaannik ullumi pingasunngornermi isumaqatigiissuteqarput.
Assi © : Camilla Dam/KNR
maajip 29-at 2019 10:57
Nutserisoq Simon Uldum

Air Greenlandimik piginnittuunerup tamakkiisumik tiguneqarnisssaa pillugu danskit naalagaaffiat SAS-ilu isumaqatigiissuteqarfigineqartut, Naalakkersuisut tusagassiorfinnut nalunaarummi naatsumi ilisimatitsissutigaat.

Namminersorlutik Oqartussat Air Greenlandimik piginneqataassutaat maannamut 37,5 procentiupput, naalagaaffiullu piginneqataassutai 25 procentiusut SAS-illu piginneqataassutai 37,5 procentiusut maanna pigineqalerput.

Nalunaarut naapertorlugu piginneqataassutinik pisinerup aningaasalersornera Air Greenlandimit danskit naalagaaffiannut SAS-imullu pissarsiassanik akiliinikkut aaqqiivigineqassaaq. Piginneqataassutinik pisinermut aki taamaalilluni paasissutissiissutigineqanngilaq.

Naalakkersuisut partiillu tapertaasup Demokraatit SAS-imut naalagaaffimmullu isumaqatigiissuteqartuupput. 

- Air Greenlandip ataatsimoortumik pigineqarnera maannakkut kalaallit assaanniilermat, tamannalu Nunap karsianut aningaasaqarnikkut isumannaatsumik pimmat,  Naalakkersuisut aamma Demokraatit ataatsimoorlutik naammagisimaartorujussuuaat.

Kim Kielsenip (S) Lars Løkke Rasmussenillu (V) Ilulissani Nuummilu mittarfiliortiternissamut danskit naalagaaffiata aningaasalersueqataanissaanik isumaqatigiissuteqarnerannut atatillugu danskit naalagaaffiata Air Greenlandimik piginneqataassutaata Namminersorlutik Oqartussanit pigineqalernissaat siunnerfittut nalunaarutigineqarpoq. Tamannalu maanna timitalerneqarpoq.

Air Greenlandimik piginneqataassutinik pisineq Inatsisartut aningaasaqarnermut akileraartarnermullu ataatsimiititaliaanni oqaluuserineqarpoq, ataatsimiititaliamili ilaasortat suliaq isertuussamik suliaraat, taamaammat timmisartuutileqatigiiffiup pisiarineqarnera pillugu isumaqatigiissummi paasissutissat killeqartut saqqummiunneqarsimallutik.

SAS-imit tusagassiorfinnut nalunaarut naapertorlugu, SAS-ip piginneqataassutai 277 millionit koruunilerlugit Namminersorlutik Oqartussanit pisiarineqassapput.

Naalagaaffiup SAS-illu piginneqataassutaata ataatsimut 461 millionit koruuninik naleqartutut nalilerneqarnerat Sermitsiaq.ag-mit siornatigut allaaserineqarpoq.

Air Greenlandip tamakkiisumik pigilernissaanut suna pissutaanersoq KNR-ip naalakkersuisut siulittaasuannut Kim Kielsenimut (S) arlaleriarlugu apeqqutigisaraluarpaa. Tamannali maannamut suli akissuteqarfiginngilaa.