Namminersorlutik Oqartussat 350 million koruuninik taarsigassarsivoq

Ukiuni kingullerni niuerfinni aningaasanik taarsigassarsiniartarfiusuni eqqissisimanngittoqarpoq, tamannalu aningaasaliinissamut ajornakusoortitsilersimavoq nunallu ilaanni qaffasinnerusumik erniaqartitsisoqalerneranik kinguneqarsimalluni. Paarlattuanik Europap Avannaani erniat appariarsimapput. Tamanna tunngavigalugu, erniat appassineranni, Naalakkersuisut pilersaarutaareersimasumik aningaasanik taarsigassarsiniarsimapput. Taarsigassarsiniarnerup ilutigisaanik Nunap Karsiata 2013-ip naanissaata tungaanut pitsaasumik akiliisinnaassuseqarnissaa isumannaarneqassaaq.

”Taarsigassarsiarineqartut Ilulissani erngup nukinga atorlugu nukissiorfissamut atorneqassapput, nukissiornermi attanneqarsinnaasumik ingerlatsinitsinni annertunerulersitsillutillu uuliamik pinngitsuuisinnaajunnaarsimanitsinnik annikillisaatissavaatigut. Nukissiorfissaq 2013-imi njaammassineqarpat illoqarfiit anginerit sisamaasut erngup nukinga atorlugu nukissiuuteqalersimassapput tamatumalu saniatigut Narsaq aamma Tasiilaq”, taamak oqarpoq Maliina Abelsen.

Ilulissat eqqaanni erngup nukinga atorlugu nukiliorfissap pingaarnertut Ilulissani innuttaasut, inuussutissarsiortut pisortallu suliffeqarfiutaat kallerup inneranik avatangiisinik mianerinnittumik pilersortussaassavai. Taassuma saniatigut erngup nukinga atorlugu nukiliorfiup illoqarfimmi kiassarneqarnikkut pisariaqartinneqartut aamma matussusersinnaavai.

Maliina Abelsen nangippoq: ”Naalakkersuisut upernaaq manna saqqummiussaanni, Akiitsunut Aningaasaliissuteqartarnermullu Periusissiami, taarsigassarsiat taakkua 350 mio. kr.-it siumut taggisereersimavaat. Erngup nukinga atorlugu  nukissiorfiup Akiitsunut Aningaasaliissuteqartarnermullu Periusissiami tunngaviusut tamakkiisumik naammassisinnaavai, tamannalu tassaavoq, aningaasaqarnikkut politikkip avatangiisinillu mianerinnilluni attanneqarsinnaasumik ingerlatsisinnaanerup ataatsikkoortinneqarsinnaanerannut assersuutitsialak.”