Namminersorlutik børnehjemmiliorput
Meeqqat angerlarsimaffiat namminersortumit pigineqartoq Nuummi aallartippoq.
Aappariit Nikolaj Olsen aamma Martha Kreutzmann Olsen ukiuni 16-ini meeqqat angerlarsimaffiini sulisutut aammalu namminneq angerlarsimaffimminni meeqqanik paarsaqartareerlutik meeqqat angerlarsimaffiannik tassa børnehjem-imik namminneq pigisaminnik ammaapput.
Illu Nuup qiterpasissuaniittoq 185 kvardrat meterisut angitigaaq, pingasunik anngajaanik sinittarfeqarpoq, isersimaartarferujussuaqarlunilu torsuusangaatsiarsuaqarpoq soorunalumi aamma iggaveqarlunilu uffarfigissaarluarlunilu perusuersartarfeqarpoq.
Nikolaj Olsen aperaarput, taama ammaanissaminnik sooq pileritsassimanersut.
- Immaqa imaappoq, suliarisarsimasat angerlatinneqaraangata ilaat nuannersuusaramik. Tulluusimaarnermik misiginartarpoq, taamaattumik soqutigilersimavara nammineq suliamik taamaattumik aallartitserusulerlunga, aammami meeqqat nuannarigakkit, Nikolaj Olsen oqarpoq.
Taanna oqaluttuarpoq, ukiorli kingulleq allanik suleqateqarlutik aallartisarlutik aallartissimallutik.
Meeqqallu angerlarsimaffiat ateqartippaat: I.M.P taannalu isumaqarpoq ”Inuuneq, Meeraq, Pinngortitarlu”.
Meeqqat angerlarsimaffianni tassani meeqqat amerlanerpaamik arfinillit tigummineqarsinnaapput, aammalu sulisut arfinillit artorfinitsinneqartussaallutik.
Aningaasalli qanoq ilillugit kaaviiaartinneqassappat?
- Taakku aningaasat pissarsiariniartussaavagut meeqqat isertarnerannit akiliutigineqartartunit, taakkua agguarlugit inissinniarsarisimavagut, imatut immaqa iluanaarnartorujussuunngikkaluarpoq, kisiannili kajungerneq tassani nukiuvoq, oqarpoq.
Nikolaj Olsen erseqqissaavoq, meeqqat sakkortunerpaatut isigineqartut tigummisarniaritik, taamatuttaaq angajoqqaanik tarnillu pissusiinik ilisimasalinnik suleqateqartarnissartik erseqqissaatigaa.
Meeqqat 16-inik ukioqalernissartik tikillugu meeqqat angerlarsimaffianni I.M.P.-mi najugaqarsinnaapput.
Ilaqutariissutsimut pisortaqarfiup taakku børnehjemmimik ammaanissaat sapaatip-akunneri sisamat matuma siorna akueraat.
Taamatuttaaq Nuup kommuniani isumaginninnermi pisortap Vibeke Møller Jensenip namminersortumik taama ammaasoqarnera nuannaarutiginerarpaa, siunissamilu suleqatigissamaarnerarlugit.
Taamatuttaaq Nuup kommunianiit erseqqissaatigineqarpoq, meeqqat børnehjem-inut inissinneqarnissaminnut utaqqisut amerliartortut aningaasartuutillu tassunga tunngasut aamma qaffakkiartortut.
