Nammineq: Tikisitat naleqquttumik piginnaasaqartariaqarput
Suliniaqatigiiffiup Nammineq-p sulisunik tikisitsisoqassatillugu suliamut piginnaasaliinnarnik siunissami tikisitsisoqartassasoq angunialerpaa. Inuit tikereernerminni pikkorissarnerpassuarnik pisariaqartitsinngitsut tikisinneqartariaqartut, Namminerup siulittaasua Vittus Jerimiassen isumaqarpoq.
-Inuimmi piginnaasanik pisariaqartitanik pigisaqariinngitsut nassaassaanngippata, taava nunaqavissut pikkorissartariaqarput, siulittaasoq oqarpoq.
Namminerup assersuutitut piaartumik iliuuseqarfissatut isigaat Namminersornerullutik Oqartussat allattoqarfiani atorfinitsitsisarneq.
-Ukiorpassuanngortuni tikisitat tassaasarput atorfimmut amigartunik piginnaanillit, tamatumalu kingunerisarpaa tikisitat pikkorissariartorlutik aallaqattaarnerujussuat, suliaminnut naleqqutilerniassammata. Taamaattumik Nammineq-miit Vittus Jerimiassen oqarpoq sulisut pigeriikkat atorluarnerusariaqartut.
Tikisitat amerlanerpaat annerpaamik ukiuni pingasuni nunatsinniittarput, ilisimalikkatillu aallaruttarmatigit iliuuseqartoqartariaqalersoq suliniaqatigiiffik isumaqarpoq.