Nammineq: Sooq danskisut qineqqusaartoqartassava?
- Qineqqusaarneq qallunaat soqutiginngilluinnarpaat. Qineqqusaartut, qineqqusaarnermilu aaqqissuisut, qallunaatuinnaq oqaluttut piffissarujussuaq atorlugu periarfissittarpaat, qineqqusaartut saallugit isumasioqatiginissaannut, tamannaluaasiit aammaarluta takuarput soqutigineqanngitsoq. Nunatta namminersulernissaanik sulissuteqartoq, peqatigiffik ”Nammineq”, sinnerlugu, Franz Heilmann Inatsisartunut qinersinissamut atatillugu taama allagaqarpoq.
Qallunaatut oqaluttunit qineqqusaartitsisarnerit soqutigineqarpallaartannginnerat pissutigalugu ”Nammineq ” isumaqarpoq, qallunaatuinnaq oqaasilinnut qineqqusaartitsisarnernik annertuallaanik aaqqissuussisoqartariaqanngitsoq.
”Nammineq”-mit tunngavilersuutigineqarpoq, Inatsisartut inissikkaangata, nunatsinni inoriaaserput politikkikkullu aaqqissuussaanerput naapertorlugu, qallunaatuinnaq oqaluttut annertoorujussuarmik inissaqartinneqartarmata, pingaartumik politikkikkut isummersortarnerni annertuumik sunniuteqartinneqartarlutik.
Tamanna pillugu ”Nammineq” allappoq, tikisitat minnerpaamik ukiut tallimat nunatsinneereeraangamik aatsaat, qinersisinnatitaalerlutillu qinigassanngortissinnaasariaqartut.
- Illuatungaatigulli, nunaqavissut nunanut allanut atuariartortut, nunatsinnit ilinniagaqarnersiuteqarnertik pissutigalugu, qinersisinnaatitaallutillu qinigassanngortissinnaasariaqarput, Franz Heilmann allappoq.
