Nammineq kajumissutsiminnik sulerusuttut amigaatigineqarput
Suliniaqatigiiffiit tassaapput Kalaallit Nunaanni Timersoqatigiit Kattuffiat, Arctic Winter Games 2016 aamma Meeqqat Inuunerissut (MIBB), taakkulu inunnik akissarsiaqartinneqaratik namminneq kajumissutsiminnik suleqataarusuttunik pisariaqartitsilluinnartuupput.
Suliniaqatigiiffiit piffissami aggersumi nammineq kajumissutsimik sulineq pillugu nunatsinni sumiiffinni assigiinngitsuni suliniaqatigiiffinnik akeqanngitsumik pikkorissaaniarput. Qaqortorlu siulliullugu juunip qaammataani tikeraarneqassaaq.
- Inuiaqatigiit taama ikitsigitilluta innuttaasut namminneq kajumissutsiminnik suleqataarusussuseqarnissaat pingaaruteqartupilussuuvoq. Suliniaqatigiiffiilli nammineq kajumissutsimik sulinermik toqqammaveqarlutik ingerlasut, nammineq kajumissutsimik suleqataasut pissarsiarinissaannut pigiinnarnissaannullu sakkussanik tigussaasunik pisariaqartitsipput, Arnakkuluk Kleist suliniaqatigiiffiit pingasuusut sinnerlugit tusagassiorfinnut nalunaaruteqarluni taama allappoq.
- Meeqqanut inuusuttunullu tunngatillugu suliniuteqartut amerlanerulersinnerisigut nunatsinni inuiaqatigiit ineriartortinneqarnerisa nukittunerulersinneqarsinnaanera aallaavigaarput, taama allapput.
Nammineq kajumissutsimik sulinermut 2016-ip ukioritinneqarnissaanut atatillugu suleqatigiinneq aallartinneqarpoq, ukiorlu taanna ilaatigut Arctic Winter Games Nuummi pisussaavoq timersornermillu aaqqissuussineq angisoorsuaq ingerlanneqartussanngorpat nammineq kajumissutsiminnik suleqataasussanik annertuumik pisariaqartitsiffiussalluni.
