Nammineq iluarisimaarinnippoq

Namminersulivinnissaq pillugu suliniaqatigiiffik Nammineq, Namminersorneq Pillugu Isumalioqitigiissitaliap ataatsimiinnera iluaraat oqarlutik kalaallit inuiattut immikkuullarissutut akuerineqarnerat ajunngitsumut alloriarnerusoq.

”Nammineq”-mi siulittaasup tullia Frans Heilmann taama oqarpoq.

Ilannguppaalu namminersulivinnissamut aqqut oqinnerulersoq: - Illuatungeriit naapittarneranni angusaqallattaartarneq isumaqarpunga takussutissaasoq namminiilivinnissamut aqqutip qanilliartornera, Frans Heilmann oqarpoq, nangillunilu: - Namminersulivissagutta akisussaaffiit tamaasa tigusussaavagut. Soorlu aatsitassat ikummatissallu, taamaattoqassappat, kisianni oqaatigisinnaanngikkallarparput qaqugorpiaq namminersulivissinnaanersugut. Oqallinneq ingerlavoq, killiffippullu paasigutsigu taava namminersulivinnissaq qaqugu eqqunneqarsinnaassanersoq ajornannginnerulissaaq, suliniaqatigiiffimmi ”Nammineq”-mi siulittaasup tullia Frans Heilmann oqarpoq.

”Nammineq” 1996-imi pilersinneqarpoq, qaammammut ataasiarlutik naapittarput, namminersulivinnissaq pillugu oqallittarlutik.