Nammineq illersornissamut politikkeqalernissaq Savalimmiuni avissaartuussutigineqartoq

Savalimmiuni illuatungiliuttut nunanut allanut illersornissamullu namminerisamik politikkeqalernissaq kissaatigaat. Savalimmiunili naalakkersuisut tamanna akerleraat.

SAVALIMMIUT: Savalimmiuni illuatungiliuttut kissaatigaat nunanut allanut- illersornissamullu tunngasut tiguneqassasut.

Danmark arleriarluni sakkutuunik sorsugiartitsisarpoq Savalimmiut Kalaallit Nunaaluunniit isumasioqqaarnagit. Siunnersuulli akuerineqarniarpasinngilaq.

Danmark sorsugiaraangat naalagaaffik tamarmi sorsoqataalersarpoq. Avannaaniittulli aperineqarneq ajorput. Folketingimi ammaanersiortoqartillugu sapaatit akunneri pingasut manna sioqqullugu Sjurdur Skaale taama oqaaseqarpoq.

Apeqqulli  tamanna maanna savalimmiuni partiit marluk  qaqippaat. Illuatungiliuttut Partiivi Tjødveldi aamma Framsøkn siunnersuuteqarsimapput nunanut allanut tunngasunut oqartussaaffiit,  illersornissamullu tunngasut Danmarkimiit tiguneqassasut.

Taamaalillu savalimmiormiut namminneq aalajangersinnaalissavaat qaqugukkut sorsussanerlutik.

 

Oqartussaaffik tigunagu tusarniarneqartarnissaq kissaatigaat

Naak partiit marluk aamma Sjudur Skaale taama isornartorsiuteqaraluartut, Skaalelu Savalimmiuni naalakkersuisuutitaqartut aappaannut ilaasortaangaluartoq, Savalimmiuni naalakkersuisut siunnersuummut akuerserusunngillat.

Imaammat; Aap -  Naalagaaffeqatigiit sorsunnernut peqataalersinnagit Savalimmiut- aamma Kalaallit Nunaat isumasioqqaarneqartassasut Sjurdur Skaale isumaqarpoq.

- Isumasiorneqaqqaartassagaluarpugut, taavalu aalajangernermi erseqqarissumik allassimassalluni, Savalimmiut Kalaallit Nunaatalu tapersersorneraa tapersersunnginneraaluunniit.

Illersornissamulli- nunanullu allanut tunngasut savalimmiunit tiguneqarnissaat oqallisigissalugit sakkortuallaaqaartoq, Skaale isumaqarpoq.

-Savalimmiuni maannakkut assigiinngitsorpassuarnik annertuunik unammilligassaqarpugut. Illersornissamut nunanullu allanut tunngasut massakkut tigussangaluarutsigit, politikkikkut nukiit tamakkiisut siunissami sivisuupilussuarmik tassunga atortariaqarssapput. Suliassallu nukingernarnerusut taamaalillutik kinguartitiinnarneqassallutik.

Danmarkip Savalimmiullu Namminersorneq pillugu isumaqatigiissutaat allanngortittariaqassapput, illersornissamut nunanullu allanut tunngasut suliat tigussaraluarutsigit.

Inuit Ataqatigiit ilaasortaatitaata Johan Lund Olsenip aamma qanittukkut erseqqissaateqarfigaa, Kalaallit Nunaat Savalimmiullu tusarniaavigineqartassasut Naalagaaffeqatigiit sorsugiartinnagit

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat