Nammineq akisartut piiarpaat

Tekst-TV nittartartagarlu atorlugu timmisartumut ilaasussanut paasissutissiisarneq pitsaanerpaavoq, oqarasuaatikkut nammineerluni akisartup atorneraniit. Taamaammat oqarasuaat nammineerluni akisartoq atorlugu paasissutissiisarneq Air Greenlandip stationimini ippassaq atuutilersumik unitsippaa.

Aallarfissat tikiffissallu oqarasuaatikkut namminnerluni akisartukkut Air Greenlandip stationimininut ukiuni arlaqalersuni paasissutissiiffigisarsimavai. Tamannali tassa siunissami oqaluttuaannanngussaaq.

Timmisartuussinermi kinguaattoortoqartillugu stationini oqarasuaammut nammineerluni akisartumut immiussinissamut angummanniarneq ajornakusoortarpoq, taamaasisoqaraangallu oqarasuaatikkut, Tekst-TV-kkut nittartakkakkullu paasissutissat assigiinngilersinnaasarlutik, ilaasussanut paatsiveerunnarsinnaasumik.

Paatsiveruttoqarnissaalu pinngitsoorniarlugu Air Greenland aalajangerpoq internet tekst-tv-lu kisiisa siunissami atortalerniarlugit.

Paamiunili Upernavimmilu, ataasiinnarmik sulisoqarfiusuni, oqarasuaatit nammineerluni akisartut iluaqutigineqarmata, taakkunani atatiinnarneqarput.