Polaroilip ikummatissaarniarfiini, nunaqarfinni arfinilinni illoqarfinnilu marlunni, nammineq akiliilluni orsersortarfinnik atortorissaarusiisoqartoq Polaroilimiit nalunaarput.
Nunaqarfinni Saqqami, Attumi, Kangaamiuni, Qeqertarsuatsiaani, Arsummi aamma Alluitsup Paani atortorissaarusiisoqarpoq.
Aamma Uummannani Tasiilamilu nammineq akiliilluni orsersortarfinnik ikkussisoqarpoq.
Angallateerarsortunit ukiuni arlalinni kissaatigineqartarpoq, pingaartumik aasaanerani angallateeqqanik angallatileruttornerup nalaani, nunaqarfinni pisiniarfiit nalinginnaasumik ammanerisa avataasigut orsussarsisinnaaneq, tassami silagitsillugu qaamatillugulu aasaanerani angallattut ilaatigut ullukkut unnuakkullu angallattarmata.
Kiffartuussinermi pitsanngoriaatit atuisunut iluaqutaajumaartut, Polaroilimit neriuutigineqarpoq, aamma neriuutigaat atuisut innuttaasullumi tamarmik paarsilluaqataajumaartut, aserorterinikkummi innarlerneqarpata iluarsaannissaat aatsaat pisinnaammat tamakkuninnga ilisimasalinnik aningaasarpassuit atorlugit iluarsaassiartortitsinikkut, Polaroilimit taama oqarput.