Nammineerta: Finn Lynge kukkuvoq
Taamatut oqariartuuteqartoqarpoq maani radioaviisimi nunarput namminersorluni naalagaaffinngorunnanngitsoq inukippallaarnera peqqutigalugu Finn Lynge oqaaseqaateqareersorlu:
- Inuit 50.000-it naalagaaffimmik nutaaliamik pilersitsiunnanngillat, Finn Lynge taama oqarpoq.
Tamannali tunngavilersuutitut atorneqarsinnaanngilaq, Elisabeth Ravn Johansen oqarpoq.
- Qassiunerput apeqqutaanngilaq, qanorli nukittutiginerput apeqqutaavoq.
Kalaallit Nunaata piginnaasakinnera, periarfissai siunissaalu pillugit nimaarneq uninniarli, nimaarnermi namminersulernissap ulluni makkunani naaggaartunit oqaatigineqartuarnera tamaanga killeqarniarli, taama Elisabeth Ravn Johansen tusagassiuutinut nalunaarummi ilaatigut allappoq.
Namminersulivinnissamut Finn Lynge qanganitsernikumik isummertariaaseqartoq Elisabeth Ravn Johansenip isumaqarfigaa. Allanit kaanngarnissaq pineqanngitsoq, kinaassutsimiilli namminermit kaanngarniarneq pineqartoq Johansenip oqaatigaa.
