Nammineerluta ikiuutissaagut
Assersuutigalugu Islandimi kajumissutsimik upalugaarsimasoqarfimmut assingusumik nunatsinni ineriartortitsisoqarsinnaasoq, nalunaarusiami naliliinermi ilaatigut taakkartorneqarpoq.
Folketingimi ilaasortaq, Sara Olsvig Illersornissamullu ministeri, Nick Hækkerup sapaatip akunnerata aallartilaarnerani illersornissamut suleqatigiissinnaaneq pillugu ataatsimiipput. Inuiaqatigiinnilu illersornissamut sullisseqataasoqalissappat, tamanna aatsaat ilinniagaqarnikkut periarfissaassasoq ataatsimeeqatigiit isumaqatigiissutigivaat.
- Avatangiisinut annaassiniartarnernullu upalungaarsimanissamut atatillugu pitsaanerusunik pisariaqartitsivugut. Siorna Islandimiikkama upalugaarsimanissamut kajumissutsiminnik sullisseqataasut pulaarpakka, isumaqarpungalu Kalaallit Nunaanni upalugaarsimanissamut atatillugu qanoq ineriartortitsissanerluta paasissallugu pisariaqartikkipput, Sara Olsvig isumaqarpoq.
Nunami, imartatsinni avatangiisitsinnilu alapernaarsuisinnaanerit assersuutitut, Qitiusumik Sakkutooqarnikkut Ilinniarfiup nalunaarusiaani taakkartorneqarput.
- Nuummi Københavnimilu politikkikkut piumassuseqartoqarpat – tamanna pissanganartumik pilerinartumillu ineriartortinneqarsinnaavoq. Illersornissamut atatillugu ilinniarfik ilinniarfiusinnaasunik periarfissarpassuaqareermat atorluarnerusariaqarpugut, taamaattumik suli amerlanerusunik ilinniartoqarsinnaasariaqarpoq, Sara Olsvig oqarpoq.