NAMMCOp ataatsimiinnera ualimut naammassivoq
Radioaviisimit NAMMCO-mi siunnersuisoqatigiinnut ilaasortaq Amalie Jessen oqaloqatigaarput. Taanna aperaarput NAMMCO nunat tamalaat akornanni sunut tunngasunut aalajangersaasinnaassuseqarnersoq.
- NAMMCOp 1992-imi isumaqatigiissutaa malillugu, aalajangiisinnaassuseqarpoq pisassiisinnaalluni, assigiinngitsunillu inassuteqaasiorsinnaalluni. Matumani pingaartinneqarpoq NAMMCOp FN-ip ataani akuerisaalluni aalajangersaasinnaasutut inissisimanera.
NAMMCOmut atatillugu maanna qanoq pisoqassava?
- NAMMCOp suliani ingerlateqqissavai. Inassuteqaatit saqqummiunneqartut, ilaasortat angerlaallugit naalakkersuisuminnut saqqummiutissavaat, suliassallu ingerlateqqitassat ingerlateqqillugit. Soorlu uagut Pinngortitaleriffimmut allaffeqarfitsigullu ingerlateqqitassaqartugut.
- Aamma NAMMCO sulinermini annertusiartuinnartumik akisussaaffeqalerami uatsinnut annerusumik suliakkersuutaasinaanera naatsorsuutigisinnaavarput, kisianni piareersimavugut. Taama oqarpoq NAMMCOmi siunnersuisoqatigiinnut ilaasortaq Amalie Jessen.