NAMMCO ukiunik 25-nngortorsiortoq
Atlantikup avannaata imartaani uumasunik piujuaannartitsinissamik tunngaveqarluni aqutsineq pillugu NAMMCO-p ilaasortani ukiut ingerlanerini siunnersortarpai.
Taamatullu suliaqarneq ilaatigut piniariaatsit pitsanngorsarneqarnerinik uumasoqatigiillu nalilersuiffigisarnerisigut siuariartoqarneranik kinguneqarpoq, tamatumalu malitsigisaanik immami miluumasut assigiinngitsut aamma amerliartulersimallutik, NAMMCO nalliuttorsiornerminut atatillugu tusagassiorfinnut nalunaarutimini taama allappoq.
Silap pissusiata avatangiisillu allanngoriartornerannut tunngatillugu immami miluumasut nerisassaqarniarnikkut pisuussutitut periarfissaasinnaanerat ataatsimiittartoqatigiit nalunaarusiami nutaami misissuiffigisimavaat.
NAMMCO-p EU-p puisit amiinik eqqusseqqusiunnaarnerata, naggueqatigiit Inuit tamatumani ilaatinneqanngikkaluartut, ajornartorsiutinik pilersitsisimanera nalunaarusiamini aamma sammivaa.