NAMMCO: - Qilalugartassiissutinut isornartorsiunerit millinngillat!

Atlantikup Avannaani miluumasut imarmiut pillugit Kommissionimi, naalisarlugu NAMMCO-mik taaneqartartumi siulittaasuusup Kate Sandersonip Piniarnermut naalakkersuisup Finn Karlsenip NAMMCO-mi ataatsimiissimanermut tunngatillugu naliliilluni ippassaq oqaaseqaataa isumaqatiginngilaa.

Finn Karlsen ippassaq radio aviisimut oqarpoq, nunatsinni qilalugartassiissutit ukioq manna siornamut naleqqiullugit ilaneqangaatsiaraluaqisut taamaattoq NAMMCO-mi ataatsimiittuniit sisamanngormat naammassineqartumit tamanna pillugu imatorsuaq isornartorsiuisoqannginnera nunatsinniit peqataasutut tamarmiullutik tupaallaatigisimagitsik.

Finn Karlsenip taama oqarnera NAMMCO-mi siulittaasuusup ataatsimeersuarnermilu peqataalluartup Kate Sandersonip isumaqatiginngilluinnarpaa.

- Ukioq manna ukiumoortumik ataatsimeersuartoqarnerani qilalugartassiissutit pillugit isornartorsiuinerit annikinnerunngillat. Suliassat arlalippassuit ataatsimeersuarnermi eqqartortussaasimavagut, taamaattumillu qilalugartassiissutinut tunngatillugu eqqartuinerput allanik eqqartugassaqarnerput tunngavigalugu ersarinnginnerusimasinnaavoq. Qilalukkat nungukkiartulernissaat taamatulli suli ernumassutigineqartigaaq. Ernumassuteqarnerlu ataatsimeersuarnermi erseqqilluinnartumik kingumut eqqartorneqaqqippoq, Kate Sanderson oqarpoq.