NAMMCO: puisinniartarnermut akerliusut ernumatitsipput

Atlantikup Avannaani immami miluumasut pillugit ataatsimiititaliarsuarmit, NAMMCO-mit, europamiut puisinniarnermut akerliuniarlutik paasisitsiniaanerat ernumanartoqartinneqarpoq, tamatumami kinguneranik nunat arlallit puisit amiinik eqqussuinissamut inerteqquteqalerniarlutik eqqarsaateqarmata.

- Taamatut paasisitsiniaanermi NAMMCO-p paasissutissaaterpassui, naalagaaffinnit puisinniartartuneersut, soqutigineqanngillat.

Puisinit tunisassianik mattussiniarneq nunanut pisuussutinik taakkuninnga nungusaataanngitsumik atorluaaniaraluartunut aningaasarsiornikkut eqquinerlorujussuarsinnaavoq, NAMMCO-p Tromsømit ataatsimiinneranit ippassaq naammassisumit tusagassiorfinnut taama nalunaaruteqartoqarpoq.

Misissuinerit ersersippaat puisit aamma arferit orsui inuit peqqissusaannut, aalisakkat orsuinit, pitsaanerusumik sunniisartut. Pingaartumik arlaannik sapigaqaraanni, uummalluttuugaanni gigtertuugaanniluunniit. Miluumasut imarmiut peqqissutsimut qanoq sunniuteqarnerat pillugu isumasioqatigiissitsinissaq NAMMCO-mit pilersaarutaavoq.