Nammco: avaartaaneq aallaanninnermit isumannaanneruvoq
Atlantikup Avannaani miluumasut imarmiut pillugit Kommissioni NAMMCO, nunatta Savalimmiut Islandip Norgellu ilaasortaaffigisaat januaarip aqqarnanni aqqaneq aappaannilu Københavnimi ataatsimiippoq, ataatsimiinnermi imaani uumasunik pinariaatsit eqqartorneqarlutik.
Eqqartorneqarputtaaq Canadami puisinik avaartaaginnarluni toqutsisarnerit.
Puisit avaartaannariarlugit ameerneqartarnerat tusagassiuutitigut sammineqaqqilerpoq nunatta Canadami puisittat amiinik pisisarsimanera saqqummiuneqarmat, tamannalu uumasunik illersuiniaqatigiiffinnit isorineqarpoq.
Nammcop Københavnimi ataatsimiinnerani erseqqissaatigineqarpoq siornaak 2004-imi ataatsimiinnermi Canadami puisinniariaaseq pillugu sukumiilluinnartumik paasissutissiisoqarsimasoq.
Taamani minnerpaaq tikillugu paasisitsiniutigineqarsimapput anaaleraluni aammali aallaammik Canadami puisinniariaatsit.
Erseqqissaqqinneqarporlu tassa avaarlugit toqutsineq qularnaatsumik atorneqarpat, anaalerlugit puisiniartarneq aallaasersornermit isumannaannerusoq.
Aamma erseqqissaatigineqarpoq puisit avaarlugit pisat toqoreernermi kingorna eqisaallattarnerat suli uumallutik aalanerannut assersuunneqarluni paasinerluneqartarsimasoq.
Nammco Islandimi marsimi ataatsimeeqqissaaq, tassanilu januaarimi ataatsimiissimaneq pillugu nalunaarusiaq saqqummiunneqassaaq.