Naluttarfissaq nutaaq

Nunatsinni naluttarfiit illup iluaniittut aappassaat piareersarneqarluni aallartippoq. Naluttarfik taanna Qaqortumiissaaq. Qaqortumilu borgmesteri tamannarpiaq pillugu Danmarkimi ataatsimeeqateqaqqammerpoq.

Qaqortumi timersortarfiup naluttarfittalerlugu iluarsartuunneqarnissaa Qaqortumi kommunalbestyrelsep tamarmiusup 500.000 koruuninik tapiiffigineqarnissaa ukiarmi akuersissutigaa.

Qaqortumi borgmesteri Simon Simonsen Danmarkimi aningaasaliisinnaasunik ataatsimeeqateqaqqammerpoq.

- Aningaasaateqarfiit marluk ataatsimeeqatigivagut aamma aningaasaateqarfissuaq Mærskip aningaasaateqarfia ataatsimeeqatigalugu, Simon Simonsen unnersiorpoq.

Taanna nassuiaavoq taakkua piumasaqaataat pilersaarutaagallartumut naleqqussarneqassasut, aggustimilu ataatsimeeqatigeeqqissallutik isumaqatigiissimanertik unnerpaa.

Simon Simonsen aperaarput naluttarfissaq qanoq naleqassanersoq.

- Maannamuugallartoq 50-70 millionit missaanni missingersuusiorneqarallarpoq, oqarpoq, erseqqissaavorlu aningaasartaat annertunerusumik iserfigineqanngikkallartut pilersaarutilli salliutinneqarallartut.

- Timersortarfik naluttarfiutigisoq aammalu kulturikkut illorsuaatigisoq sunik ilaqassanersoq maanna qimerloorallarparput, oqarpoq.

Simon Simonsen aperaarput sooq naluttarfeqarnissartik pisariaqarsorineraat.

- Sumiluunniit illoqarfimmut tikikkaanni pisariaqartarpoq illoqarfiup tikikkuminartup tikiffiginissaa sammisassaqarluartoq pisariaqartinneqartorlu, oqarpoq.

Nangipporlu:

- Illoqarfittut ukiorpassuarni timersornikkut kulturikkullu siuttutut nunatsinni ilaasareerluta, maanna kissaatigivarput aningaasanik unerartitsigallarsinnaanerput, oqarpoq.

Nassuiaavoq Qaqortup kommuniani aningaasartuutissat siumut ukiunut pingasunut missingersuusiorneqareersimammata sanaartugassanut allanut inissaqartitsisinnaalersimallutik timersortarfillu iluarsartuuttariaqalersimammat taamatut aalajangersimallutik.

Naluttarfissaq qaqugu atuutilissanersoq Simon Simonsenip suli oqaatigisinnaanngikkallarpaa.