Qaqortumi naluttarfiliornissamik pilersaarutit ilusinikkiartuaarput. Qaqortup kommunea Sanaartornermut Aningaasaateqarfimmut Mærskillu aningaasaateqarfianut qaammatip uuma naanerani qinnuteqarniartut Qaqortumi borgmesteri Simon Simonsen oqaluttuarpoq.
Aningaasat qinnuteqaatigineqartussat ikittuinnaanngillat. 70 millioni koruunit tapiissutitut pissarsiarineqarsinnaassasut, Qaqortup kommuneanit neriuutigineqarpoq.
Naluttarfittaarnissaq kisimi pilersaarutigineqanngilaq, kulturikkut illorsualiornissaq aamma pilersaarutigineqarpoq; soorlu aamma timersortarfitoqqap iluarsaanneqarnissaa pilersaarutigineqartoq.
Timersortarfik 1973-imi sananeqartoq allilerneqassaaq, isiginnaarianut inissaqartitsilerluni.
Aningaasaateqarfinnut taakkununnga marlunnut qinnuteqaatit aningaasaateqarfinnit ukiaru suliarineqassapput, aappaagulu akissuteqarfigineqarnissaq Qaqortup kommuneanit ilimagineqarpoq.