Nalunaq unikkallarpat Nanortalik eqqugaassaqaaaq

Nalunami kuultisiorfimmi kuultimik piiaaneq unitsikkallarniarlugu aalajangerluni Crew Gold Corporation ilisimatitsivoq.Kuultisiorfiup matugallarnissaa Nanortallip Kommunianut kinguneqarnerlussaqaaq, suliffeqarfimmiit akileraarutitigut isertitaqarluartarsimagami.
Allattoq Jens Thorin
novembarip 10-at 2008 15:55

- Inuit 25-it 30-it akileraarunnaarpata, kommuninmi 1500-it missaanni inoqartumi tamanna annaasaqaatigissavarput. Immikkullu malunaateqassapput Kuultisiorfimmi sulisut aningaasarsiarissaartuummata, borgmester Kristine Råhauge oqarpoq.

Taassumali tuppallersaatigaa, sikorsuit peerunneranni Nanortalimmi aalisakkanik tunisassiorfik ingerlallualersimammat. Kisianni aamma Nalunami sulisimasut Nanortalimmi suliffissarsiuussisarfimmi allatsikkunik, sinerissami suliffissarsiortutut allatut piareersimalissasut oqaatigai.

- Kuultisiorfimmi sulinikuusut ilaat Narsami aatsitassanik suliaqarnermi sulipput. Aamma qamussuarni motoorilinnik ingerlatsisut ilaat Nanortalimmi sulilernikuupput. Kisianni taama amerlatigisut tassanngaannaq suliunnaarnissaannut piareersimanngilagut, Nanortallip kommuniani borgmesteri Kristine Råhauge oqarpoq.

Nalunami putorsuaq kuultilimmik piiaffusoq ukiup naanerani imaarsimassaaq, kuultisiorfillu tamatuma kingorna ingerlajunnaassaaq.

Kisianni kuultisiorfiup qanoq pineqarnissaata tungaanut atortut nakkutigineqassapput. Taama Aatsitassanut pisortaqarfik nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq