Nalunami sulisoq ajunaartoq
Nanortalimmi kuultisiorfimmi sulilluni ajutoortoqarmat inuk ataaseq ajunaarpoq. Ajunaartup lastbiilerujussuit, dumperinik taaneqartartut, ingerlanniartillugit ikaartarfiup ungalui aporsimavai.
Angut ajunaartoq ajutoornermi lastbiiliniit igeriunneqarsimassangatinneqarpoq. Ajunaartoq ikaartarfiup ataaniittoq nassaarineqarpoq.
Sunarpiaq toqqutigisimaneraa ilisimaneqanngilaq.
- Isumannaallisaanermi aalajangersakkat malinneqarsimapput, aquttorlu misilittagartuujugaluarpoq, ajunaartup suliffiata, RC Entreprenørservice-p Qaqortumeersup pisortaa Rasmus C. Rasmussen oqarpoq.
Ajunaartoq suli 30-liisimanngitsoq Sisimiuneersuuvoq, RC Entreprenørservice-milu sulileqqammerluni. Ilaqutaasut RC Entreprenørservice-mit ilisimatinneqareerput.
Ajunaarneq politiinit maanna misissorneqaleruttorpoq.
