Nalunami kuultimik nassaartoqarnissaa siunissamut aalajangiisuussaaq

Nalunami kuulti piiarneqarsinnaasoq ukiuni tulliuttuni marlunni tallimaniluunniit piiarneqarsinnaavoq. Kuultimilli nassaartoqarsinnaanera ilimagineqarsinnaavoq, misissuiffigineqarsimanngitsut misissuiffigineqarpata.

Nalunaq ingerlaannassappat kuultimik nassaartoqaqqinnissaq aalajangiisuussaaq. 

Nalunami kuultip annertussusia maanna ilisimaneqartoq naapertorlugu kuultimik ukiuni pingasunit tallimanut piiaasoqarsinnaavoq. 

Siornatigut misissuiffigineqarsimanngitsuni kuultimik nassaartoqarsinnaasoq ujarassiooq oqarpoq. 

Canadamiut aatsitassarsiutileqatigiiffiat AEX Gold, suliffeqarfiup pilersaarutai naapertuutissappata, Nalunami kuultisiorneq 2021-imi aallarteqqinniarneqarpoq. 

Nalunami kuultinik piiaaffik pillugu paasissutissat.

  • Kuultisiorfik Napasorsuup Qooruaniippoq Nanortallip avannamut kitaaniilluni, Nanortalimmit 33 kilometerisut ungasitsigisumiilluni.
  • Kuultimik piianeq siulleq 2004-mi aallartinneqarpoq.
  • Crew Gold Corporation A/S (CGC)  piginneqataassutit annersaanik pigisaqalerpoq, Nuna Minerals A/S piginneqataasuulluni.
  • 2006-imi CGC kuultisiorfimmik kisimiilluni piginnittuulerpoq suliffeqarfiup Nuna Minerals piginnittuunera tamaat pisiarigamiuk.
  • CGC-ip kuultisiorfik aningaasatigut ajornartorsiuteqarneq pissutigalugu 2008-mi matuaa.
  • Kuultisiorfik tuluit aatsitassarsiorfianit Angel Miningimit 2009-mi pigineqalerpoq, suliffillu Arctic Mining piginneqataasutut aallartillugu.
  • Kuultisorfik 2013-mi Arctic MIning-imi aningaasatigut sivisuumik ajornartorsiuteqarnerup kingorna matuvoq.
  • Ukioq 2004-mit 2013-imut 367.130 ounce kuultimik tassalu 11,42 tonsinik piiaasoqarpoq.
  • Kuultisiorfimmi agguaqatigiissillugu 95-it missaanik sulisoqarpoq. 
  • Kuultimik kuultisiorfimmeersumik Kunngissaq Frederik taassumalu nulia Mary 2004-mi assammiortaarput.

Paasissutissat: Aarhus Universitet, SRK, KNR. 

Kuultisiorfiup ammaqqinneqarnissaanut Greenland Venture aamma Vækstfonden  15 million kr-nik aningaasaliipput, marluullutillu piginneqatigiissutit 5,5 procentiinik piginneqataalerlutik. 

Kuultinik piiaaffik ukiuni arlaqartuni ingerlaannassappat kuultip annertussusianit maannamut ilisimaneqartumit annertunerusumik nassaartoqarnissaq pisariaqartinneqarpoq.  

Taama oqarpoq, ujarassiooq, geofysikereq Henrik Sabra  Nalunami kuultisiornissamut Greenland Venturemut aamma Vækstfondemut siunnersortaasimasoq. 

- AEX-imut suliassaq annertooq tassaavoq piiagassamik suli peqarnera qulakkiissallugu, tassalu   ukiuni tulliuttuni pingasuni tallimaniluunniit piiasinnaaneq kisiat pinnagu, sulili annertunerusunik piiagassaqarnera uppernarsineqarnissaa pisariaqarpoq, Henrik Sabra oqarpoq. 

Nalunami taassumaluunniit avataani 5-10 kilometerisut ungasitsigisumi kuulteqarnissaa qulakkiissallugu taamaalilluni kuultisiorfik anginerusunngorlugu  sanaartorfigineqarluni, Henrik Sabra oqarpoq. 

Annikitsut, imminnulli qanittut  

Kuultisorfimmi Nalunami marloriarluni piiaasoqareerpoq. 

SRK suliffeqarfiuvoq siunnersuisartoq, suliffeqarfimmik AEX Gold-imik piginneqataavoq.  Suliffeqarfik taanna 2007-imi teknikkimik nalunaarusiorpoq misissuinermilu paasineqarpoq, kuultimik piaaffimmi 11,5 tonsinik piiaasoqarsimasoq. 

Kuultip Nalunamiittup piiarniarneqarnera ajornakusoorpoq.

Innami sivingasorujussuarmi  piiaaffeqarpoq,  taavalu kuulterasaarfii amiloruukkaasuupput qipiluallutillu. 

Kuulteqarfiusumullu anngussinnaagaani kuulteqarfiusumut  eqimalluinnartumut  annguttoqarsinnaavoq. 

Taama oqaluttuarpoq GEUS-imi ujarassiooq Stefan Bernstein.

- Tassalu piiarneqartoq allanut sanilliullugu kuultitaqarneruvoq, aammali qaarsup piiakkap kvartsiusup kuulteqassussia allanngorarluni atuaruminaalluni, taamaammat piaarnissaa pisariunerulluni, Stefan Bernstein oqarpoq.

Pingajussaanik...

AEX Goldip kuultisiorneq aallartippagu, suliffeqarfiit Nalunami kuultisiortut pingajuat aallartissaaq.  

Aatsitassarsiutileqatigiiffik Crew Gold Corporation  2004-imi Nalunami  siullersaalluni  kuultisiorneq  aallartippaa.

Crew 2008-p tungaanut kuultisiorpoq. Kuultisiornerup unitsinneqarneranut Crewip  pissutaanerarpaa, aningaasarsiornikkut ajutoorneq assartuinermilu aningaasartuuteqarnerulerneq.

Kuultisiorfimmi Nalunami piiaanissamut akuersissut Angel Miningimit 2009-mi tiguneqarpoq, piginneqataatalu Arctic Miningip kuultisiorneq ingerlappaa. 

Aatsitassarsiutileqatigiiffiup Nalunami kuultusiorneq aallartinngisaannarppaa,  kuultisiorfillu Angel Miningip 2013-omi matuaa. 

Aatsitassarsiutileqatigiiffiit marluk  Nalunami kuultimik piiaanikut kingusinnerusukkut akiliisinnaajunnaarlutik matupput
Suliffik Crew 2010-mi akiliisinnaajunnaarluni matuvoq Artic Mining 2017-imi.

SRK-p  nalunaarusiaani nalilerneqarpoq kuultisiorfimmi Nalunami 8 tonsitut annertutigisumik kulteqarpoq. 

Nunarsuarmi kuultusiorfiusunut allanut sanilliullugu mikisuararsuartut inissisimavoq. 

Kisianni Nalunami kuultisiorfik suli soqutiginaateqarpoq  eqiterussimalluartumik kuulteqarmat. 

- Nalunap ilimanaateqarluarsinnaanera nalilerpara.  
- Nalunami suli saffiugassaqarluartoq nalunngilarput. 
- Tamanna uppernarsarneqareerpoq. 
- Sumiiffinnullu allanut sanilliullugu taama annertutigisumik nassaarnissaq annertunerulluni, Henrik Sabra oqarpoq.

Pilersaarutit annertunerit

AEX Gold Nalunami pilersaarutit saniagut allanik aamma pilersaaruteqarpoq. 

Suliffeqarfiup Nalunaq A/S pigisaraa, taassumalu saniatigut kuultisiorfimmi Vagarimi piiaanissamut akuersissuteqarpoq,  aatsitassarsiorfinni ilisimaneqartutut  Nanortallip kuulteqarfiata avataniittummi. 

Taassuma saniatigut AEX Taartumi piiaanissamut akuersissuteqarpoq, taanna kangerlummiippoq, Sermiligaarsuup Taartullu akornanniittumi taanna Arsuup avannaanniippoq.

GEUS-imit nalunaarutigineqartut naapertorlugit tassani 1990-ikkunni kuulteqartoq paasineqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat