Nalunami ajunaarneq misissorneqalerpoq

Nalunami kuultisiorfimmi ippassaq qaarusummi sulisoq canadamiu ajunaarpoq.

Ajunaartoqarnera paasiniaaviginiarlugu Aatsitassanut Qullersaqarfik misissuiartortitsilerpoq, ajunaarnerimmi taamaattut pinngitsoortittariaqarput – naak ajornakusoorsinnaagaluartoq, Aatsitassaqarnermut Psiosrtaqarfimmi pisortaq Jørn Skov Nielsen oqarpoq.

-Aatsitassarsiorfiit suulluunniit suliffigalugit ulorianartuupput. Ajutoornerit pinngitsoortinniarlugit qullersaqarfimmit iliuuseqarniarpugut; Sullivinnik Nakkutilliisut peqatigalugit aatsitassarsiorfinni sulineq isumannaannerulersinniarlugu suliniuteqalerpugut.

Ippassaq ajunaartoqarnera tunngavigalugu aatsitassarsiorfiit qinnuigaavut ajunaarutaasoq paasisaqarfigitinnagu atorneqaleqqissanngitsoq.

Naliliinerput tunngavigalugu Nalunami piiaaffimmi isumannaallisarnerit pitsaapput, isumannaallisaanermi ataatsimiititaliat peqqussutit malillugit sulilluarput, akulikitsunillu attaveqarfigisarpavut, Aatsitassaqarnermut Pisortaqarfimmi pisortaq Jørn Skov Nielsen nassuiaavoq.

Nanortalimmi politiit ippassaq misissuinerminni paasivaat ajunaartup nammineq pisuussutigisimagaa. Sapaatip-akunnera una Aatsitassaqarnermut Pisortaqarfiup misissussavaa ajunaarneq qanoq pisimasinnaasimanersoq.