Nalunaaruteqarneq Canadamit naammagittaalliutigineqarpoq
Taamatut nalunaaruteqartoqarnera Canadami Inuit itigartillugu qisuariaateqarfigipallappaat.
Terry Audla, Inuit suliniaqatigiiffianni Inuit Tapiriit Kanatami præsidentiusoq tusagassiortunut oqarpoq, taamatut nalunaaruteqartoqarnera Inuit akuerisimanngikkaat Greenpeacellu nunaminni imartaminnillu pisussuutinik atuinermik inerisaanermut akerliulluni suliniuteqarneranut atassuteqartoq.
-Inuit suliniaqatigiiffiisa Canadallu issittuani siuttuusut Kirunami saqqummiunneqartoq isumaqatigiissutiginngikkaat nalunngilara, aamma Greenpeacep soqutigisaminik sulissuteqarnermini nunap inuiinik atorluaaniarsarinera akuerinagu ataatsimoorluta itigartipparput, Terry Audla oqarpoq.
Kirunami nalunaarut nunap inuiisa susassaqarfiinut akulerunniarsarinerusoq ersarissoq, Duane Smithip, Canadami Inuit Circumpolar Councilimi (ICC) præsidentiusup tusagassiortunut oqaatigaa. Smithittaaq oqaatigaa, issittumi pisuussutinik atuinermik ineriartortitsineq pillugu ataatsimoortumik nalunaarut Issittumi Inuit siuttuisa 2011-mi isumaqatigiissutigalugulu atsioqatigiissutigisimagaat.
-Uagut nalunaaruteqarnitsinni nassuiaatigineqartutut, uagut, Inuit, ineriartortitsisoqarnissaanut akerliunata erseqqissaatigaarput, allatuulli suliffissanik, peqqinnissakkut pitsaasumik sullinneqarnissaq, pitsaasumik ilinniartitaanissaq inissianillu pitsaasunik kissaateqaratta. Sunali tamaat akigalugu ineriartortitsinissamik kissaateqanngilagut, akisussaassuseqartumik ineriartortitsisoqassaaq, avatangiisittami uumasullu illersorneqarnissaat peqatigitillugu aamma kissaatigigatsigu, Terry Audla naggasiivoq.
