Nalunaarusiaq tigulluarpaat
- Ilaatigut aatsitassarsiorneq eqqarsaatigalugu oqallittarnivut ilimagisanik aammalu immaqa isummiuteriikkanik toqqammaveqartaramik, soorlu tamatta milliarderinngornissatsinnik sinnatuaqinermik, Kuupik Kleist oqarpoq. Taassumalu tikkuarpaa, aatsitassarsiornikkut isertitassaasinnaasunik ilimasunnersuaq, nalunaarusiap inerniliussaasa atuarneqareernerisut qimanneqartariaqartoq.
Oqallinneq aamma Nunatta qanoq iluarsaanneqarnissaannik imaqartariaqarpoq:
- Inuussutissarsiutit ataasiakkaaginnaat immikkoortillugit isiginiarneqarsinnaanngillat. Isiginiarneqartussat pingaarnerpaaq tassaavoq, inuiaqatigiinnut sunniutaat qanoq ittuussanersut.
Nalunaarusiaq "Kalaallit Nunaannut iluaqutissaaqqullugu" Kalaallit Nunaanni pinngortitap pisuussutaasa uumaatsut iluaqutaasinnaanngorlugit atorluarneqarnissaannik siunertaqarluni ataatsimiititaliamit suliarineqarpoq. Ataatsimiititaliaq taanna immikkut ilisimasalinnik Ilisimatusarfimmit Københavnillu Universitetianit toqqakkanik inuttaqarpoq. Nunarsuup sannaanik ilisimatooq, professor Minik Rosing ataatsimiititaliami siulittaasuuvoq.
Nalunaarusiamilumi aamma aatsitassaannarnik aallussinissamut mianersoqqusipput.
Ataatsimiititaliap naatsorsuinerisa takutissimavaat, suliat angisoorsuit amerlasoorsuilluunniit ataatsikkut aallartinneqaraluarpata, aatsitassanit Nunatta Karsiata isertitaasa Naalagaaffimmit ataatsimoortumik tapiissutit taarsersinaanavianngikkaat.
Aningaasaqarnermut naalakkersuisup mianersoqqusinermut isumaqataavoq:
- Mianersortumik taanna siunissarput tassani tikkuartorneqarpoq.
Ataatsimiititaliaq isumaqarpoq, aatsitassarsiornermit isertitaajumaartut Aatsitassarsiornermi Aningaasaateqarfimmut inaalissorneqartariqartut.
- Aatsitassat kinguaassiortuunngillat, taakkunanngalu tuniniaagaanni Kalaallit Nunaata pilimaassutaanik ilanngaanerussaaq. Tamakkunannga isertitat ulluinnarni aningaasartuutinut matussutigigaanni, kinguaariit tulliusussat naliliutaannik tigusinerussaaq, ilisimatuut allapput.
Taamalu inassuteqarneq aningasaqarnermut naalakkersuisumit ilalerneqarpoq:
- Isumaqarpunga aatsitassanut aningaasaateqarfik taanna siunertamisut ingerlasariaqartoq. aatsitassarsiortoqarpat aatsitassarsiortoqanngikkaluarpalluunniit aningaasat isaasut aningaasartuutivullu sapinngisamik oqimaqatigiittuaannartariaqarput, Vittus Qujaukitsoq oqarpoq.
