Nalunaarusiaq partiit akornanni assortuussutaavoq

Nunatsinni aalisartut nunani allani aalisartunut naleqqiullutik appasinnerusumik akilerneqartarnerat nalunaarusiami nutaami KNAPK-mit saqqummersinneqartumi ersersinniarneqarpoq. Nalunaarusiaq ullutsinni aalisartut qanoq sussaanngitsigisumik akilerneqartarnerannut takussutissiisoq Siumumit oqaatigineqarpoq. Illuatungaanili Demokraatit isumaqarput nalunaarusiami kisitsisit atorneqartut naammaginanngitsuusut.
juunip 27-at 2011 16:10

Assersuutigalugu raajat nunatsinneersut ukioq kingulleq agguaqatigiisillugu kiilumut 18,55 koruuneqartinneqarput, Italiamulli tunineqaqqinnerminni kiilumut 60,68 koruuninik akeqartinneqartarlutik.

Tamanna aalisartut ullutsinni qanoq sussaanngitsigisumik akilerneqartarnerannut takussutissiisoq Siumumeersoq Finn Karlsen isumaqarpoq.

Inatsisartut aalisarnermut ataatsimiititaliaanni ilaasortap pissutsit taamaannerat akuerineqarsinnaannginnerarpaa, suliffeqarfissuit aalisartunut akissarsiagitsitsinerujussuusinnaasut isumaqarluni. Nipisaat suaannut akit qaffariarujussuarnikuunerat assersuutigaa:

- Ukiualunnguit matuma siorna nipisaat suaat kiilumut 14-15-16 koruunit missaani akeqartinneqarput. Massakkulli kiilumut 40 koruunit tungaannut akeqarput, Finn Karlsen oqarpoq.

Suliffeqarfimmik ingerlatsinerminut aningaasartuutit nunatsinni qaffasinnerunerat peqqutaasoq Royal Greenlandimit oqaatigineqartoq upperiuminaatsippaa.

- Maani nunatsinni suliffissuarmik ingerlatsineq akisuallaarujussuartoq Royal Greenlandikkut oqartarput. Kisianni aningaasartuutinik annikillisaataasinnaasunik  imermut innaallagissamullu tapiisoqartarpoq, Siumumeersoq Finn Karlsen oqarpoq.

Akit nikinganerujussuat peqqutaalluni Royal Greenlandip Polar Seafoodillu Danmarkimi suliffeqarfiutaanut avammut tunisinermi iluanaarutaarujussuartartoq aamma oqaatigaa.

- Taamatut akikitsuaranngoriarlugit Danmarkimi immikkoortortaqarfimminnut tuniseqqittarnerat ajornartorsiutaagunarpoq. Tassanngaanniit akit qaffarujussuarlugit avammut tunisarpaat, taavalu Kalaallit Nunaanni aalisartunut akiliutigisartagaat mikisuarakasiulluni. Tassani iluanaarutigisartagaat annertoorujussuuvoq, kalaallit aalisartui sussaanngitsunik akilersorneqarput, Finn Karlsen oqarpoq.

Nalunaarusiaq KNAPK-mit sapaatip akunnera kingulleq saqqummiunneqartoq Demokraatiniit naammaginarsorineqanngilaq. Demokraatit oqaaseqartartuat Niels Thomsen isumaqarpoq paasissutissat nalunaarusiami saqqummiunneqartut amerlanerusinnaagaluartut:

- Qanoq tutsuiginartiginersoq apeqquserneqartariaqaraluarpoq. Isumaqarpunga nalunaarusiap angusaqarusussusaa annertunerusariaqarsimagaluartoq. Soorlu akit nikinganerat qanoq annertutiginersoq nalunaarusiami misissorneqarpoq. Kisianni itinerusumik misissuisitsisoqartariaqaraluarpoq. Aperisoqarsimasinnaasariaqaraluarpoq sooruna taamatut inissisimasoqartoq, oqarpoq.

Aalisartut isertitarisartagaat annertunerusariaqannginnamik?

-  Aalisartut qanoq isertitaqartarnerat akuleruffigisussaasutut isiginngilara. Siunissami aalisartut ullumerninngaanniit pitsaanerujussuarmik akissarsisinnaanissaat politikkikkut qularnaarniarsarisarparput. Ullumikkut aalisartut amerlanerit akuerineqarsinnaanngitsunik akissarsiaqartuupput. Kisianni niuerfissuarni pissutsit uagut politikeritut aalajangersaaffigisinnaanngilagut, aalisarnerulli aaqqissuussaanera qiviartariaqarparput, taavalu naleqqussaaffigalugu aningaasarsiorneq pitsaanerulersillugu, Niels Thomsen oqarpoq.