Nalunaarusiaq nutaaq: Timmisartoq 1968-imi nakkarmat qaartartut sisamat tamarmik aserorput

Timmisartorsuup qaartartorsuutip B-52-ip Pituffiup eqqaani 1968-imi nakkartup usii qaartartut qanoq pisimanersut paaserusullugu Per Stig Møllerip Dansk Institut for Internationale studier januaari qaammataataa nalunaarusioqqullugu misissuisilerpaa.

Timmisartorsuaq B-52 brintimik qaartartulianik sisamanik usivoq. Qaartartut timmisartorsuup nakkarnerani aserornerarsimanerarlugit Amerikamiut qallunaallu ukiuni 40-ini oqartuarsimapput.

Apeqqusiisoqartarsimavorli, soorlu BBC-p ukiarmi novembari qaammataagaa aallakaatitsinermini apeqqusiisimasoq.

Oqallinneqarpallaaqimmat Per Stig Møllerip pisoq misissorpaa, ilisimatusartullu Svend Aage Christensenip "qaartartoq periarfeerussaq" pillugu nalunaarusiaa piareerpoq.

Misissuinerup inerniliinera malillugu qaartartut sisamat timmisartorsuup nakkarneratigut aserorneqarsimapput atomitalinnillu taavani immap naqqanut qimaannakkanik soqanngilaq.

- Qaartartut nakkarnerminni aserorsimasut atorsinnaajunnaarsimasullu paasinarsisipparput. Timmisartup nakkarnerata kingorna qaartartoqarsimanngilaq. Tamanna assortugassaanngilaq, Svend Aage Christensen nalunaarusiami inerniliinermini allappoq.

Qaartartut nakkartumiittut atomitaata nakkarfimmi qinngornerisa takutippaat qaartartut sisamat tamarmik aserorsimasut.

- Tamanna ajutoornermi misissuinermi paasisaavoq nutaaq. Kisitsisit paasineqartut qanoq pisoqarsimaneranik nassuiaataasup eqqortuunerarneqarnerannik apeqqusiisoqarsinnaajunnaarsitsipput apeqqullu pillugu tatiginninnerulernissamut tunngavissaalluni, Svend Aage Christensen allappoq.

Svend Aage Christensenip Amerikamiut Pituffiup eqqaani qaartartussarsiorlutik ujaasisimannginnerat aamma paasinarsisippaa, taamaattorli qaartartut atortuisa ilaat "marskalstav"-imik taaneqartoq ujarsimavaat.

Nalunaarusiaq Dansk Institut for Internationale Studier-ip nittartagaani uani: www.diis.dk -mi atuarneqarsinnaavoq.