Nalunaarusiaq nutaaq: Sermersuaq aakkiartupiloorpoq

Silap pissusaata allanngornerata, nunarsuullu kiatsikkiartornerata, Kalaallit Nunaata sermersua sukkanerujussuarmik aakkiartortissavaa, kiatsikkiartorneralu ilutigalugu imavissuit annertunerulissapput.
Allattoq Jaaku Lyberth
decembarip 14-at 2009 07:08

Pisullu taakku marluk pissutaallutik nunarsuarmi imavissuit qaffakkaluttuinnassapput. Tamakku pillugit paasissutissat nalunaarusiarineqarnerat "The Ice Sheet in a Changing Climate" danskit nunanut allanut ministeriannit, Per Stig Møllerimit, naalakkersuisullu siulitaasuannit, Kuupik Kleistimit, ullumi saqqummiunneqassapput, silap pissusaata allanngoriartornera pillugu Københavnimi ataatsimeersuartoqarneranut atatillugu aaqqissuussinermi, Bella Centerimi pisumi.

Sermersuup aakkiartornerata kingunerisaanik kalaallit inuuniarnermikkut atugaasa allannguuteqarnerat, nalunaarusiami ersersinneqarpoq. Nalunaarusiami sammineqanngilaq immami sikup annikillinerata kingunerisaanik inuussutissarsiutit kinguneri qanoq innersut.

Sermersuup aakkiartorneratigut aalisartut aalisarnerlu qanoq eqqorneqarnersut ilisimaneqarpallaanngilaq, Morten Skovgaard Olsen oqarpoq.

Tuluit Nunaanni universitetimi, Sheffieldimi, professorip, Terry Callaghanip, erseqqissarpaa, nunarsuarmi silap pissusaata allanngornerata kingunerisaanik Kalaallit Nunaat annertuumik unammilligassaqartoq.

Silap pissusaata allanngorneratigut nunat inuii annertuallaartumik eqqugaapput.

Nunarsuarmioqataanerup annertunerulernera, imaluunniit silap pissusaata allanngornerata assigiinngissutaasa immikkoortinniarneqarnerat, Kalaallit Nunaanni inuiaqatigiinni takujuminaatsuunerarlugu Terry Callaghan oqarpoq.

Silap pissusaata allanngornera Kalaallit Nunaanni ulluinnarni inuunermi ajortuinnavimmik kinguneqarnavianngitsoq, Terry Callaghan oqarpoq.

Kalaallit Nunaat naammattorsuarmik imissaqalissaaq nunamut naggorissaatitut atorneqartussamik, aamma uumasuutinik inuussutissarsiuteqalernermik kinguneqarsinnaasumik, professor Terry Callaghan oqarpoq.