Nalunaarusiaq nutaaq: Meeqqat sumiiffinni assigiinngitsuni 20-ni najugaqarallartinneqartarsimapput
Meeqqat oqaaseqartartuat, Aaja Chemnitz Larsen, nalunaarusiaq saqqummiunneqartoq najoqqutaralugu kommuninut qineqqusaartoqarneranut atatillug meeqqat pisinnaatitaaffii ilanngullugit oqallisigineqassasut.
”Inuk inuuvoq - qanorluunniit mikitigigaluaruni.” Qulequtaq taanna tassaavoq meeqqat pisinnaatitaaffii pillugit suliniaqatigiiffimmiit - MIO-miit - misissuinerup siulliup qulequtaa. Misissuinerit taakku marluusussaapput.
Misissuinermi meeqqat 33-it arfineq marluk aamma 16-it akornanni ukioqartut apersorneqarsimapput, taakkulu ulloq unnuarlu angerlarsimaffinni - imaluunniit - angajoqqaarsiaritinneqarallartuni najugaqartuupput. Meeqqat apersorneqartut nunatsinni sumiiffinniit arfineq marlunneersuupput.
Meeqqat angerlarsimaffimmik avataanut inissinneqarsimasut ikiorneqartarneranni - meeqqanik inuusuttunillu ikiorsiisarneq pillugu Inatsisartut peqqussutaanni maleruagassat - aamma Naalagaaffiit Peqatigiit Meeqqat pillugit Isumaqatigiissutaanni allassimasut malinneqartarsimannginnerinut nalunaarusiami arlalinnik assersuussiortoqarpoq.
”Ajoraluartumik nassuerutigisariaqarparput meeqqat angerlarsimaffiup avataanut inissinneqartartut suleriaatsinut - inissiigallartoqartussaaneralu pillugu aalajangiisarnernut - akuliusimatinnissaat pikkorluffigigipput, pingaartumik suleriaatsit pilersaarusiorneqartarnerannut tunngasut kinguarsimaffigineqartorujussuupput. Meeqqat misissuinermi peqataasut 33-iusut ilaasa 30-t namminneq pillutik suleriaasissamut pilersaarut ilisimasaqarfigisimanngilaat, ilarpassuisalu suleriaasisamut pilersaarut suunersoq ilisimanagu, meeqqat oqaaseqartartuat,Aaja Chemnitz Larsen, oqarpoq.
Meeqqat apersorneqartut ataasiakkaat ilaatigut sumiiffinni assigiinngitsuni 20-ni najugaqarallartinneqartarsimapput.
Nalunaarusiaq taanna tunngavigalugu meeqqat innusuttullu oqaloqatiginnittarfianniit - MIO-miit - kommunalbestyrelsini ilaasortanngortussat kajumissaarneqarput meeqqanut tunngatillugu sullissivineqarfiit annertusaavigineqassasut.
Nalunaarusiami aamma ersersinneqarpoq, meeqqat MIO-miit apersorneqarsimasut ajunngitsumik atugaqarnerarsimasut - amerlanerpaartaallu oqarsimapput allamut inissinneqarallarnissartik sioqqullugu atugarisimasaminnut sanilliussissagunik maanna atukkatik pitsaanerulersimasut.
Meeqqat pillugit suliniaqatigiiffimmeersut neriuutigaat apriilip aappaani qinersinerup kingorna kommunabestyrelsini ilaasortanngorumaartussat meeqqanik sullisseriaatsit pitsanngorsaavigineqarnissaat pimoorunnerussagaat.