Nalunaarusiaq: New Yorkip guvernøriata arnat arlallit kanngutsaatsuliorfigisimavai

New Yorkip guvernøriata, Andrew Cuomop, arnat arlallit atoqatigiinnermut tunngasutigut akornusersortarlugillu kanngutsaatsuliorfigisarsimavai.

New Yorkip naalagaaffiani inatsisitigut oqartussaqarfik taamatut inerniliisoq, New York Times kiisalu NBC News allapput.
Misissuinermi paasineqarpoq, atorfilittat arlallit Cuomop kanngutsaatsuliorfigisarsimagai.

New Yorkip naalagaaffeqatigiillu inatsisai arlallit Cuomop unioqqutissimagai, naalagaaffimmi inatsisinut naalakkersuisup, Letitia Jamesip, erseqqissarpaa.

Qaammatini sisamani misissuisoqareersoq kinguneranik inerniliinerit, marlunngormat Nunatsinni nalunaaqutaq naapertorlugu ullukkut, taassuma tusagassiortunik katersuititsinermi saqqummiuppai.

- Naalagaaffiup naalagaaffeqatigiillu inatsisai unioqqutillugit, maanna suli atorfilittaasut atorfilittaasimasullu, Guvernør Cuomop kanngutsaatsuliorfigisarsimavai, Letitia James oqarpoq.

- Misissuisut arlaannaannulluunniit attuumassuteqanntsut paasivaat, ilaatigut arnat inuusuttut piumanngitsut attuualaartarlugit, kunissorlugillu pakkunniartarlugit kanngutsaatsuliorfigisarsimavai, kanngutsaatsumillu upissuttarsimallugit, taanna nangilluni oqarpoq.

Tamatuma kinguninga Cuomo naatsumik oqaaseqarluni, kinaluunniit kissaatiginngisaanik atoqatiginianngisaannarlugulu attuualaarnikuunngisaannarlugu oqarpoq.

- Inuttut taama ittuunngilanga. Taamalu ittuunngisaannarnikuullunga, taanna oqarpoq.

- Pisimasut eqqortut allaaserinerannit allaanerujussuupput.

Nalunaarusiaq naapertorlugu, guvernøri 63inik ukiulik kanngutsaatsuliorfigalutillu atoqatiginiartarsimasutut arnat aqqanillit unnerluutigaat. Taakkunannga qulingiluat maanna suli siornatigullu naalagaaffimmi atorfeqartuupput.

Unnerluutigineqartut ingasannersaasa ilaanni, Cuomop arnaq atorfilik allaffimmini kisimeeqatigalugu, tujuuluata iluatigut iviagissiorsimavaa.

Arnaq taanna nassuiaavoq, nammineq teknikkikkut ajornartorsiutaasumut ikiuuttussatut aggeqquneqarsimalluni.
Arnaq atorfilik alla oqaluttuarpoq, kanngutsaatsumik guvernørip upissuttarsimagaani. Taanna ilaatigut oqarfigisimavaa arnaatissarsiorluni, allalerisarnersoq angutinillu utoqqasaanik ilaqartarnersoq apersorsimallugu.

Nalunaarusiami quppernertut 165itut imartutigisumi ilaatigut atuarneqarsinnaavoq, arnat ilaata ilangaluni misigisani pillugit tamanut oqaluttuarmat, Cuomo akiniaarusuummersimasoq. Arnaq taanna qanorpiaq akiniarsimaneraa atuarneqarsinnanngilaq.

Nalunaarusiaq naapertorlugu aamma Cuomo qanimullu suleqatai suliffeqarfimmi qunusaaralutillu aarlerisaarisarnerat nalinginaasimasoq, New York Times allappoq.

Suliffeqarfimmi pissutsit "kanngutsaatsuliortoqarsinnaaneranut" pissutaaqataasut, nalunaarusiami atuarneqarsinnaavoq.

Demokraatit Partiiani ilaasortat nuimasut New Yorkimi ilaasortaaqatertik, guvernøritut atorfimminiit tunuaqqullugu innersorpaat. Sinniisuutitat Repræsentanternes Husimi siulittaasuat, Nancy Pelosi, oqarpoq.

- Pisarnittut arnat sassarlutik eqqortumik oqaluttuartut tapersersorpakka. New Yorkimut asanninera guvernøritullu atorfiup ataqqinera pissutigalugit, guvernøri tunuaqqullugu kaammattorpara, tusagassiuuteqarfik Reuters naapertorlugu Pelosi oqaaseqaammini taamatut allappoq.

USAp præsidentia, Joe Biden, siornatigut oqarnikuuvoq, unnerluussinerit tunngavissaqartut misissuinerit takutippassuk, Cuomo tunuartariaqartoq.