Nalunaarusiaq misissoqqissaarneqassaaq

Meeqqat Inuusuttullu Pillugit Ilisimasaqarfiup, MIPI-p nunatsinni meeqqat piitsut pillugit nalunaarusiaa maanna Naalakkersuisunit misissoqqissaarneqassaaq kisitsisinillu nalilersuinermik misilittagalinnit nalilerneqassalluni.

Taama ilisimatitsivoq ilaqutariinnut naalakkersuisoq Tommy Marø, taassumalu nalunaarusiaq ”soqutiginartutut isumakulunnartutullu” taavaa.

Taamaattorli Tommy Marø aamma isumaqarpoq nalunaarusiap tutsuiginassusia arlalitsigut nalilersorneqarsinnaasoq.

- Assersuutigalugu misissuinermi piitsuussuseq pillugu nassuiaatit pingasut naleqqiunneqarnerat uparuarneqarsinnaavoq pingasullu taakkua nunani tamalaani piitsuussutsip nalilerneqartarneranut akuerisatut taaneqarmata. Piitsuussuseq allamut naleqqiussaq aamma piitsuussusertut paasineqartoq kisimik nunani tamalaani akuerisaallutik uuttuutaasarput. Pissakilliornermik naliliineq aallaavigalugu ikiorsiineq piitsuussusertut taaneqarsinnaanersoq oqallisigineqarsinnaavoq, taamatulli ikiorsiisarneq nunatsinni pissutsinut naleqqussagaavoq. Taamatullu ikiorserneqartartut marlunnut immikkoortinneqarsimasinnaagaluarput, tassa ataavartumik taamatut ikiorserneqartartunut aamma piffissap ilaannaani taamatut ikiorserneqartartunut, Tommy Marø oqarpoq.

Aamma nalunaarusiaq nalunaarusiap immikkoortuanut siullermut, ukiormanna siusinnerusukkut saqqummertumut naleqqiunneqarsinnaannginnera pitsaanngitsutut taavaa. Taakku immikkoortut marluk assigiinngitsunik aallaaveqarput. Siulliup meeqqat aalajangersimasut sammivai, aappaatalu inuiaqatigiit misissuiffigeqqissaarnerisigut piitsuussuseq nassuiarlugu.

Taamaakkaluartoq nalunaarusiap nalilersuiffigilluarneratigut, meeqqat atugarissaanngitsut pitsaanerusumik atugaqalernissaannut nalunaarusiaq atorneqarsinnaasutut Tommy Marøp isumaqarfigaa.