Nalunaarusiaq kiisami saqqummiunneqalerpoq

’Maanna killiffiusoq periarfissaanngilaq’, oqallisissiami 37-nik quppernilimmi, Akileraartarnermut Atugarissaarnermullu ataatsimiititaliap siorna maajimi saqqummiussaani tamanna oqariartuutigineqarpoq. Inuiaqatigiinni aningaasaqarniarneq eqqartorneqaleraagat oqaaseqatigiit taakku naalakkersuisunit atorneqartalersimapput.

Aningarsartuutit isertitanit amerlanerulersimanerat anigorniarlugu naalakkersuisut tungaanniit qanoq iliuuseqartoqarnissaanik nassuiaat suli maannamut utaqqisaajuarsimavoq.

Akileraartarnermut Atugarissaarnermullu ataatsimiititaliap nalunaarusiaa atuaqqaartinnagu qanoq iliuuseqarniarneq oqaatigisinnaanagu naalakkersuisuisut utoqqatsissutigisarpaat.

Illuatungiliuttut Naalakkersuisooqatigiit pisuutippaat, utaqqisitsinerarlugit, tassami ilaatigut piniartut qanoq iliuuseqarfiginissaat qangali pisariaqalersoq suli aaqqiivigineqanngimmat.

Akileraartarnermut Atugarissaarnermullu ataatsimiititaliap siorna oqallissaarusiaani siunnersuutissanik arlalinnik takkuttoqarpoq, soorlu Nunatta karsianut aningaasanik amerlanernik isaatitsisalernissaq siunniunneqarluni, akileraartartut toqqaannartumik eqqunngikkaluarlugit, tassami sulisinnaasut suliffissallu suli ikippallaarmata.

Ilaatigut aamma siunniunneqarput akileraarusioriaatsit arlallit, ilaatigut eqqaaneqarlutik ineqarnermut akileraarut aamma aningaasanik iluanaarniarnermi isertitat akileraarusersortarneri.

Akileraartarnermut Atugarissaarnermullu ataatsimiititaliap siulittaasua, Torben M. Andersen Radioaviisimut siorna maajip 31-anni oqarpoq:

- Akileraarusioreriaatsit assigiinngitsut allanngortinneqarsinnaasullu siunnersuutigaavut, akileraarusersueriaaseq kikkunnut tamanut tulluarsagaq siunniullugu, taamaaliornikkut Nunatta karsianut isertitaasartut amerliniarlugit, Torben M. Andersen oqarpoq.

Taassuma aamma ilaatigut tikkuarpai, avatangiisit pillugit akileraartalernissaq siunniunneqarsinnaasoq.