Nalunaarusiaq: Kalaallit Nunaat unammilleqataavoq
Unammilleqatigiinnermut Nunani Avannarlerni oqartussaasut Islandimi Reykjavikimi ataatsimeereerlutik nalunaarusiaanni tamanut ullumi saqqummiunneqartumi tamanna takuneqarsinnaavoq.
Nalunaarusiaq qulequtaqarpoq "Competition Policy and Financial Crises" - Unammillernermut politikki aningaasarsiornikkullu ajornartorsiornerit, tassanilu erseqqissarneqarpoq, kalaallit aningaasaqarnerisa annikitsunnguup ammasullu pisariaqartikkaa suliffeqarfiit sullerissutsiminnik pitsanngorsaajuarnissaat.
Sulliviit naleqqussarnissaannut pisariaqartinneqartut, unammilleqatigiinnerup pilersissavai, suliffeqarfiit taamaalillutik naammassisaqarsinnaanertik, nunanit tamalaanik niueqateqarnertik minneruleraluartoq pakkersimaarsinnaallugu, unammillersinnaassutsimik nukittorsarneratigut. Tamatuma kingorna sulliviit allilereqqissinnaapput, akit qaffasissusaat pissusissamisooqqilerpat.
Taamaattumik pingaaruteqarpoq, unammilleqatigiinnermut ajoqutaasunik eqqussisoqannginnissaa, matumani ilanngullugit nioqqutissanik illersuiniarluni aaqqiinerit tapiisarnernillu aaqqissuussinerit, tamakkumi ajornartorsiornermut sivitsorsaataaginnassammata, nalunaarusiami, suleqatigiissitamit Nunani Avannarlerni unammilleqatigiinnermik ingerlataqartunit suliarineqartumi oqaatigineqarpoq.
