Nalunaarusiaq: Kalaallit Nunaanni piujuaannartitsinissaq amigaataavoq
- Ingasappallaaqaaq, taama oqarluaannaraanni ajunnginneruvoq. Amerlavallaat pisarineqarsimapput, Hans Meltofte oqarpoq.
Taanna nassuiaavoq, uumasut amerlanersaat eqqarsaatigalugit ajunngitsumik ingerlasoqartoq, Kalaallit Nunaannili appat eqqarsaatigalugit ajornartorsiuteqartoqarpoq, Qeqqanimi appat ukiut 70-it matuma siornatigisulli amerlatiginngiunnaarput, taamanikkut amerlassusaasa 4 procentiinai maanna piummata, aarrit qasigissallu aamma piniapilunneqarpallaarnerat tikkuarpaa.
Hans Meltoftilli taama oqarnera Kalaallit Nunaanni Aalisartut Piniartullu Kattuffianni siulittaasup, Leif Fontainep upperinngilaa, oqarluni:
- Taama oqaaseqarneq annertunerusumik tupaallaataanngilaq. Nalunngilarput maani issittumi pinngortitaq tassaasoq annertunerpaamik aqutsisoq. Tassalu aarrit aammalu appat suli amerlalluinnarnerat nalunngilluarparput. Kisianni qasigissanut tunngatillugu, puisit taakkua Nunatsinni kujammut illuariartornerat qangalili ilisimaneqarpoq, tassami ukiuni kingullerni amerlasuuni qasigissat takussaarpiarunnaarsimapput, tassalu pinngortitap nammineerluni
ingerlaasaa tassani qularnanngilluinnaqqissaartumik tunngaviuvoq, Leif Fontainé oqarpoq.
Leif Fontaine taama oqarpoq. Taanna Norgemut ataatsimiigiaqqammerpoq, Nunatta Kitaata avannaani aaffattassat 68-inut amerlineqarnissaat ataatsimiinnermi aalajangerneqarluni. Misissuisimaneq Leif Fontainip tassa akuerinngilaa, apparpassuaqarpormi, aamma qasigissat aarrillu nungusaataanngitsumik piniarneqarnerarpai. Ikilisimappata, piniapilunneq peqqutaasimassaaq.
Silap pissusaa Issittumi apeqqutaasorujussuuvoq, aalajangiisuulluinnarluni. Tamanna maani najugaqartugut nalunngilarput. Uumasut pineqartut pillugit ima nassuiaatissaqarpoq:
Ukiut 300-t matuma siornanut naleqqiullugu inuit quleriaammik amerlinikuupput, tassa Kalaallit Nunaat Danmarkimut Norgemullu ukiut 300-t matuma siorna attaveqalerpoq. kalaallit Nunaanni maanna aamma atortorissaartorujussuupput, angallatinik sukkasuulianik sakkunillu mutinik peqartoqaqaaq, Hans Meltofte nassuiaavoq.
Tamakku saniasigut kalaallit aalajangersimaqqissaartunik ajornartorsiuteqarput, aalajangiisartummi, tassa politikerit, taavalu aalisartut piniartullu imminnut qanittuaraapput.
- Nukappiarapiluttut oqarnittuut: Hirtshalsimi kommunalbestyrelsemi ilaasortat aalisagartassanik aalajangiisartuuppata qanormita issagaluarpa?
Ilanngullugu nassuiaatigaa inuit ataasiakkaat najugaqarfimmi sunniuteqarsinnaanerat sumiiffippassuarni iluaqutaasoq, malittarisassaliortoqaraangalli inuit imminnut ungasillinerulaartartut.
Europami malittarisassaliortarneq Bruxellesimut nuunneqarmat pitsaanerulersimaqisoq Hans Meltoftip assersuutigaa.
Pisassiisarnerli Københavnimi Belgiamiluunniit malittarisassaliuunneqartassappat kalaallit takorloorsinnaagunanngilaat.
- Uanga aamma taama isumaqanngilluinnarpunga. taakku assersuutitut taaginnarpakka, avataanit isigalugu qanoq paasisariaqarnersut. Kalaallit politikerii aalajangiisussaapput. uanga oqartussaanngilanga, Hans Meltofte naggasiivoq.
