Nalunaarusiaq inaarutaasumik sammivaat

februaarip 14-at 2007 10:50

Amerikamiut kilitsissiaqarfiata, CIA-p, peqqarniisaarniatut pasisanik isertortumik angallassisarsimaneragaanera pillugu EU-mi nalunaarusiaq tusaamasaqarfigereerparput. Nalunaarusiarlu EU- mi ilaasortat inatsisartuini inaarutaasumik massakkut sammineqarpoq.

Nalunaarusiami isummiussat ersarilluinnarput. Tassa CIA 1.245-riarluni peqqarniisaarniatut pasisanik timmisartuussisarsimavoq. EU-Parlamentimi ilaasortat isumaqarput; USA peqqarniisaarnianik malersuerusungaarnermini inuit pisinnaatitaaffiinik unioqqutitsisarsimasoq, kisianni nalunaarusiaq naapertorlugu parnaarussivinnik isertortunik takussutissaqanngilaq.

EU-Parlamentip innersuussutigaa MinisterrĂ¥di nunat 14-iusut, CIA-p peqqarniisaarniatut pasisanik angallassisarnermini aqqusaartarsimasai, peqatigalugit suliassaq malersoqqissagaat. Ilanngullugu EU-Parlamentimit innersuussutigineqarpoq CIA-p peqqarniisaarnianik timmisartuussisarsimanera pillugu USA-mi inatsisartut misissuisitsiniarnerat suleqataaffigineqassasoq.

Tyskit, maanna EU-mi siulittaasuutitaqartut, CIA-p timmisartuussisarsimaneri pillugit misissueqqittoqarnissaa kissaatiginngimmassuk tupaallannartuuvoq, misissuisoqarnissaami EU-mi ataatsimiititaliarsuup kissaatigimmagu.

Folketingimi Atlantikup Avannaani Suleqatigiit aamma Enhedslistep, SF-ip, Socialdemokratit kiisalu De Radikalit misissueqqissaaartussamik ataatsimiititaliornissaq kissaatigaat, Kalaallit Nunaanni, Savalimmiuni Danmarkimilu CIA-p isertortumik timmisartuussisarsimaneragaanera iternga tikillugu taamaalilluni misissuiffigineqarniassammat. Kisianni danskit naalakkersuisuisa, tapersersortaasalu Dansk Folkepartip, tamanna itigartitsissutigaat.