Koraaleqarfik kiattup aalisagaanik timmissanillu amerlasoorujussuarnik uumasoqarfiusoq naalliuppoq, nalinginnaasumik qalipaatigissaarluartuusartut qarsortiterlutik, ajornerpaamillu pisoqarnerani toqusarlutikAssi: Richard Till/Flickr Creative Commons

Nalunaarusiaq: Great Barrier Reef ajorluinnarpoq

Nunarsuarmi koraaleqarfiit annersaannut Great Barrier Reefimut siunissaanut missiliuinerit ”ajortuminngaanniit ajorluinnartunngorput.”

The Great Barrier Marine Park Authoritymi oqartussat aatsaat siullermeertumik taama naliliipput.

Matumanilu silap kianneruleriartornerata malitsigisaanik immap kissatsikkiartornera pissutaanerarneqarpoq.

- Immap qaavata asseqanngitsumik kissatseqqanerata kingunipiluisa koraalit pinngortitami ataqatigiinnerisa ajortumiit ajorluinnartumiilersippai, oqartussat allapput.

The Great Bariier Marine Park Authorityp taama ukiut tallimakkaarlugit nalunaarusiarisartagakkaminut atatillugu nalunaaruteqarpoq.

Koraaleqarfik taanna 1981-imi nunarsuarmiunut eriagisassanngortinneqarpoq, koraaleqarfillu 2300 kilometerinik isorartussuseqartoq annaanneqassappat nunarsuarmiunit, nunap ilaanit, inuiaqatigiinniillu angisuumik sunniuteqarluartumillu iliuuseqartoqarnissaa pisariaqarpoq.

- Koraaleqarfik Australiap qanoq ittuussusianut pingaarnerpaanut ilaavoq, siunissaanullu missiliutit pitsanngorsarnissaanut pingaarluinnartuuvoq, nalunaarusiami allassimavoq.

Naasorissaanermit akuutissanik kuugaartsitsineq missiliutit ajorneranut pissutaaqataasoq nalunaarusiami aamma allassimavoq.

- Piffissaarutilerpugut, koraaleqarfik siunissamut ungasinnerusumut annaanneqassappat massakkut iliuuseqartoqartariaqarpoq, nalunaarummi allassimavoq.

Koraaleqarfik kiattup aalisagaanik timmissanillu amerlasoorujussuarnik uumasoqarfiusoq naalliuppoq, nalinginnaasumik qalipaatigissaarluartuusartut qarsortiterlutik, ajornerpaamillu pisoqarnerani toqusarlutik.

Piffissaq ungasinnerusoq eqqarsaatigalugu silap pissusiata allanngoriartornerata unitsinnissaanut iliuuseqartoqartariaqarpasippoq, taamaakkaluartorli Australiami naalakkersuisut piffissamut qaninnerusumut suliniutissanik allanik aamma isumaliuuteqarput.

Australiap naalakkersuisui Parisimi isumaqatigiissut malinnerarlugu uteriisaarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat