Nalunaarusiaq eqqaavimmut igiinnarli
- Danmarkimi ikinnerusussuteqartut pitsaasumik ikiorsiiffigineqartannginnerat pillugu isornartorsiuilluni nalunaarusiaq eqqaavimmut igiinnarneqarsinnaavoq, Danmarkimut nunasisut qimaasullu immikkoortinneqarlutik ilungersuatinneqartartut, ammip qalipaataa tunngavigalugu immikkoortitsisarnermik akaarinninngissuseqartarnermillu EU-p misissuisartuisa, ECRI-mik taaneqartartut, nalunaarusiaat pillugu, ministeriuneq Anders Fogh Rasmussen oqarpoq.
Ikinnerussuteqartut atugarisaasa inatsisitigut sukateriffigineqarsimanera ECRI-p nalunaarusiamini ilaatigut tikkuarpaa. Danmarkimi immikkoortitsisarneq akiorniarlugu inatsisitigut aqqutissiuussisoqarsimanngitsoq, nalunaarusiami aamma isornartorsiorneqarpoq.
Danskip inatsisilerituup professoriusup, ECRI-milu siulittaasup, Eva Smithip, nalunaarusiaq allassimavaa. Danmarkimi naalakkersuisut nalunaarusiassatut siunnersuut atuareerlugu sakkortuumik siusinnerusukkut isornartorsiuisimapput. ECRI-lli paasissutissat eqqunngitsut kisiisa aaqqiiffigisimavaat, naliliinerit isornartorsiuinerillu aaqqiiffigineqarsimanngillat.
