Nalunaarusiaq atorluarneqaqquaa

Nunatsinni mittarfiliortiternissat pillugit nalunaarusiaq kingulleq Københavnip Handelskoliani aningaasarsiornermik ilisimatuup Lars Lund-ip suliarisisimasaa atorluarneqartariaqartoq Inatsisartut Attaveqaqatigiinnermut Ataatsimiisitaliaanni siulittaasoq Agathe Fontain isumaqarpoq.

Ilulissani Nuummilu mittarfiit 1799 meterinut tallineqarpata Kangerlussuarmi mittarfiup atorneqarsinnanera killeqalissasoq, Københavnimi handelskolemi aningaasaqarnermik ilisimatuup Lars Lund-ip nalunaarusiaani oqaatigineqarpoq. Kangerlussuarmi mittarfik ammatiinnarneqarpat inuiaqatigiinnut aningaasartuut pisariaqanngitsoq 1,8 mia. kr.-ussasoq Lars Lund-ip naatsorsorsimasaani allaaserineqarpoq.

Inatsisartuni Attaveqaqatigiinnermut ataatsimiisitaliami siulittaasoq Agathe Fontain isumaqarpoq nalunaarusiaq Naalakkersuisunit atorluarneqartariaqartoq.

- Paasitippaatigut eqqarsarluaqqaartariaqartugut. Naalakkersuisut sulinerminni inuiaqatigiit aningaasartuutissai eqqarsaatigalugit nalunaarusiaq Naalakkersuisut atorluartariaqarpaat, Inatsisartuni Attaveqaqatigiinnermut ataatsimiisitaliami siulittaasoq Agathe Fontain oqarpoq.

Københavnimi handelskolemi aningaasarsiornermik ilisimatuup Lars Lund-ip nalunaarusiaa qujanartuusoq Angallannermut Naalakkersuisoq Jens Napaattooq isumaqarpoq, kisitsisilli ungasinnerusumut isigisut atorneqartariaqarsorai.

- Naalakkersuinikkut qiviaraanni kisitsisit apeqquserneqarsinnaasut nammineq oqariartuutigivai, kisitsisillu ullumikkumeersut aallaavigalugit saqqummiilluni. Isumaqarpunga siunissaq ungasinnerusoq eqqarsaatiginerullugu isigisariaqartugut, nunatsinnummi takornariat tikittartut amerliartorput amerlanerulernissaallu sulissutigineqartariaqarpoq. Jens Napaattooq nangilluni oqarpoq Kangerlussuarmi inuussutissarsiorneq ataatsimut isigalugu periarfissarpassuaqartoq, mittarfittaannaalu aallaavigalugu akilersinnaannginneraaneq pissusissamisuunngitsoq, taamatullu oqallinneq unitsinneqartariaqartoq Angallannermut Naalakkersuisoq Jens Napaattooq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat