Nalunaarusiaq aalisartunut ajunaarutaasussaq

januaarip 07-at 2007 13:30

Aalisarnermi inuussutissarsiuteqarnerup aalisarnermi inatsit nutaaq nuannaarutigigaluarlugu aappaatigut aalisarnermi inuussutissarsiuteqarnermi piviusut ajuusaarutigigai, GA-p tassa sulisitsisut kattuffiata ataani kilisaataatillit ataatsimiititaliaata siulittaasuata Søren Brandtip ukiortaami oqalugiaatitut allakkiarisimasaani taama allassimavoq.

Raajat piniagaanerinut nalunaarusiaq nutaaq tunngavigalugu kilisaataatilinnut millionerpaalunnik annaasaqaataasussanngussaaq.

Kilisaataatillit allakkiaat naapertorlugu Royal Greenlandip ukiumut 20 mio. koruunit annaasassavai, tamatumunnga tunngaviulluni nalunaarusiami piumasarineqarsimammat pisat ilanngaasernagit 25 procentii nunami tunisassiorfiusumut tunineqartarnissaat.

Siusinnerusukkut imaakkaluarpoq pisat 25 procentii ilanngaatigereerneqartarlutik, tassa raajat piareereerlugit tuneriaannaat uani pineqarlutik.

Kilisaataatillit allakkiaminni isummersorput tunisassiorfiit ukiumut raajanik 11.000 tonsinik annaasaqartassammata tunisassiorfik nunamiittoq ataaseq matuneqartariaqartoq taamalu kilisaammik pilersitsisoqarluni.

Taamatuttaaq qalerallit 25 procentii nunamut tunineqartartussanngornerat kilisaataatilinnit nuannarineqanngeqaaq. Tassami kilisaataatillit aningaasarpassuarnik imaani angalaatigaluni tunisassiorsinnaasunik kilisaatinik aningaasaliisimagaluarput, taakkulu aningaasaliissutigineqartut malittarisassat nutaat atuutilernerisigut tamakkiisumik atorneqarsinnaajunnaartussanngornissaat kilisaataatillit erseqqissaatigaat.

Søren Brandtillu allakkiaa naapertorlugu ajornartorsiut annerpaaq uaniippoq taamatut aalajangiinerit tamarmik illuatungeriit tassa aalisartut kilisaataatillillu apereqqaannguarnagit Nuummiit tamarmik aalajangerneqarsimammata.