Nalunaarusiaq: Aalisarnermi aaqqissuusseqqinneq iluanaaruteqassutaasinnaavoq
Naatsorsueqqissaartarfiup Københavnip Universitetiani ilisimatuunut suliakkiissutigisaani suli saqqummersinneqanngitsumi nalunaarusiami taamanna allassimavoq. AG taama allappoq.
Aalisarneq pisariaqanngitsumik akisuvoq, tassami aalisarneq politikkikkut suliaqarnermi suliffissaqartitsinermut pingaartumik illoqarfinni minnerni tunitsiveqarfinni atorneqartoq nalunaarusiami inerniliunneqarpoq.
Raajartassiissutit avataasiortunut pingaartumik raajanik qalipalinnik tunisassiortartunut tunineqartartartuuppata millioninik pingasunik kisitsitalinnik iluanaaruteqarnerusoqarsinnaavoq.
Sulisunik 430-nik soraarsitsisoqaraluarpalluunniit pitsanngorsaanikkut suliffissaaleqisumut ataatsimut millioningajannik iluanaarnerusoqarsinnaasoq nalunaarusiami allassimasoq, AG allappoq.
- Aalisarnermi suliaqartut amerlanerujartortillugit siunissami aalisakkat ikinneruleriartussapput, aalisartut naammassisaqarsinnaanerat annikinneruleriartussalluni. Aalisarnermik suliaqarfik suliffissaqartitsiniarnermut tunngasunik eqqumaffiginniffigissallugu akisuujuvoq, Københavnip Universitetiani lektori Max Nielsen nalunaarusiami siulersortaasoq allappoq.
AAMMA ATUARUK Aalisariummik pisinissaq utaqqitinneqassaaq
Innersuussutigineqartoq alla tassaavoq Nunatta aalisakkat suli suliarineqanngitsut nunanut allanut tunisariaqarai. Assersuutigalugu qalerallit suli suliarineqanngitsut suliarineqareersuniit iluanaarutissartaqarnerupput.
Taamaammat Namminersorlutik Oqartussat tulaassisussaatitaaneq atorunnaarsillugu aalisartut sumi aalisarusunnerminnik sumullu tuniserusunnerminnik namminneq aalajangiisinnaalersittariaqarpaat, innersuussut taama allassimavoq.
AG-lu naapertorlugu nalunaarusiaq aalisarnermut piniarnermullu naalakkersuisoqarfimmut decembarimili tunniunneqareersimagaluartoq naalakkersuisunut suli saqqummiunnneqanngilaq.
Lektorip Max Nielsenip nalunaarusiaq suli saqqummiunneqartinnagu suliaq oqaaseqarfigerusunnagu KNR-imut oqaatigaa.
