PITUFFIK Nalunaarusiap qaammatini marlunni utaqqineqartariaqarnera Inuit Ataqatigiit apeqquserpaat
Pituffimmi isumaqatigiissummut atatillugu Namminersorlutik Oqartussat inissisimanerat pillugu inatsisilerituup nalunaarutaa danskisut naqitamik taamaallaat pigineqarnerata ilisimatitsissutigineqarnera sooq qaammatit marluk utaqqereerluta aatsaat paasissavarput?
Naalakkersuisut siulittaasuata Kim Kielsenip Pituffimmi isumaqatigiissummut atatillugu Namminersorlutik Oqartussat inissisimanerat pillugu sivisuumik oqaaseqarnikuunngeriarluni oqaaseqarneranut atatillugu Inuit Ataqatigiit politikkikkut oqaaseqartartuat Aqqaluaq B. Egede tusagassiuutinut nalunaarummi tallimanngormat ilaatigut taama aperivoq.
Inatsisilerituup misissuinerata tamanut saqqummiunneqarnissaanik Inuit Ataqatigiit ujartugaannut Kim Kielsen akissuteqareersorlu, Aqqaluaq B. Egede Inuit Ataqatigiit sinnerlugit tusagassiuutinut allagaqaateqarpoq.
Naalakkersuisut siulittaasuata nassuiaataani atuarneqarsinnaavoq nalunaarusiaq inunnut susassaqartunut tusarniaassutigineqareerluni nutserneqarnissaanut atatillugu ingerlateqqinneqarsimasoq.
- Susassaqartunut tamanut soorunami tusarniaassutigineqassaaq, kalaallisuunngortillugulu soorunami aamma saqqummiunneqassalluni. Nalunaarusiap Naalakkersuisunit tiguneqarnerani sooq Inatsisartut ingerlaannartumik allakkatigut kalerrinneqarsimanngillat? Naalakkersuisut oqaloqateqarnissaq salliutissimassagaluarpassuk paasinninnermik naammattuuisimassagaluarput. Paarlattuanilli maannakkut qaammatini marlunni kingullerni apeqqutit saqqummiuteqattaakkavut akissutissiffiginiarlugit maannakkut tusagassiorfiit aqqusaaqqaarlugit immitsinnut attaveqatigiittariaqalersimavugut, Aqqaluaq B. Egede oqarpoq.
Nalunaarusiap kalaallisuunngortillu nutserneqarnera qaqugu naammassiniarneqarnersoq Inuit Ataqatigiit paaserusuppaat, soorlu aamma inatsisilerituup oqaatsit marluk atorlugit nalunaarusiaminik tunniusseqqusimannginnera sumik tunngaveqarnersoq paaserusukkaat:
- 700.000-it aamma 1 millionit koruunit akornanni akilimmik suliassiissusiigaanni tamanna ilimagineqarsinnaagaluarmat, Inuit Ataqatigiit politikkikkut oqaaseqartartuat Aqqaluq B. Egede oqarpoq.
