Nalunaarsuisannginneq aaffattassanut ikiliallatsitsivoq
Qaanaap Upernaviullu imartaani aarrit 75-it ukioq manna pisassiissutigineqarput, siorna pisassiissutigineqartut amerlaqatigiinnangajallugit.
Kitaani aarrit 38-t pisassiissutigineqarput, siorna pisassiissutit 65-iusut.
Tunumi aaffattassat aamma ikilipput. Aarrit 23-t ukioq manna pisassiissutigineqarput, siorna pisassiissutigineqartunut naleqqiullugit arfineq-marlunnik ikinnerullutik.
Nungusaataanngitsumik aaffanniartarnissaq anguniarneqarmat aaffattassat ikilineqartut Aalisarnermut Piniarnermullu Aqutsisoqarfiup ilisimatitsissutigaa, soorluttaaq ilanngullugu erseqqissaatigineqartoq, piniartut aaffattaminnik annaasaqarsimasut nalunaaruteqartarnissaat pisariaqartinneqartoq.
Aaveq pisarineqarsimagaluarluni annaaneqartoq ataaseq nalunaarutigineqarsimasorlu kingulleq pivoq ukioq 2006-imi.
Avannaani aaffattassanik ikililerinnginnermut ilaatigut pissutaatinneqarpoq, aarrup neqaa qimminut nerukkaatissatut piniartunit pisariaqartinneqarmat.
