Nalunaarsuisalernissaq ujartorpaa
Innuttaasut pisortanit sullinneqarnerat Inatsisartunut ilaasortamit Asii Chemnitz Narupimit, Inuit Ataqatigiinneersumit, apeqquserneqarpoq.
Kommunerujussuit pilersinneqarnissaannut atatillugu pingaartumik isumaginninnerup iluani sullissinerup pitsaassusaa ilaatigut apeqquserneqarpoq, Inatsisartunilu oqaluuserineqarnissaa Asii Chemnitz Narupimit siunnersuutigineqarluni.
Allattoq Mads Lynge
marsip 12-at 2008 15:34
- Innuttaasut isumaginninnikkut kommuneqarfiit ataasiakkaanit sunik neqeroorfigineqarsinnaanersut ersernerluttorujussuuvoq, Asii Chemnitz Narup oqarpoq.
Naalakkersuisut nakkutilliinissamut pisussaaffeqarnertik eqqumaffigalugu, sullissinermi killiffiusumik nalunaarsuisarnissaat pisariaqarluinnartoq, Asii Chemnitz Narupip ilanngullugu oqaatigaa:
- Piviusoq unaavoq: Kommuneqarfinni tamani nalunaarsuisoqarneq ajorpoq, aamma nalunaarsuisoqartarsimagassagaluarpat qitiusumit aamma katersorneqarneq ajorput. Taamaammat oqarsinnaaneq ajorpugut suut neqeroorutaanersut, sullissinerillu pitsaassusaat oqaatigisinnaaneq ajorlugu, Inuit Ataqatigiit sinnerlugit Inatsisartunut ilaasortaq Asii Chemnitz Narup apersorneqarluni oqarpoq.
