Nalunaaquttap nikinnera eqqaamallugu

Naak suli aputeqaraluartoq aammalu aasap naasui suli puttussuutilinngikkaluartut, aasaanerani nalunaaqutaq unnugu atuutilissaaq. Tassami maanna piffissanngorpoq Nunatta ilarujussuani nalunaaquttap siuartinnissaanut.
marsip 26-at 2011 14:45

Unnugu nalunaaqutaq qulinut Kitaani Tasiilamilu nalunaaqutaq aqqanermut siuartinneqassaaq.

Illoqqortoormiunili aatsaat unnuap qeqqanut nalunaaqutaq ataatsimut siuartinneqassalluni.

Illersornissaq pillugu sulliveqarfinni tassalu Pituffimmi, Station Nordimi aamma Danmarkshavnimi nalunaaqutaq allanngortinneqarneq ajorpoq.

Aasaanerani nalunaaquttap allanngortinneqartarnera Nunatsinnut imatut iluaqutaaneq ajoraluarpoq, tassami aasap ilarujussuani sumiiffiit ilaanni seqineq kaaviinnartorsuusarami.

Europami nalunaaquttap nikisittarnera assigiinngitsunik peqquteqartumik iluaqutigineqartarpoq. Nunatsinni nalunaaquttap nikisittarneranut pissutaaneruvoq, Europami angallanneq eqqarsaatigalugu ukioq naallugu piffissamik assigiimmik maanngaanniit atuisinnaanissarput.