Nalliuttorsiulerutta Nunarput Islandilu unammissapput
Nunatsinni angutini assammik arsarluni nunanut allanut unammisartut, Nunattalu U-21-mi nunanut allanut unammisartui, marloriarlutik unamminissaminnut, ulluni makkunani Nuummi Inussivimmi sungiusaleruttorput.
Unamminissami siullermi Nunatsinni angutini inersimasuni nunanut allanut unammisartut aamma Islandimiut U-21-mi nunanut allanut unammisartui unammissavaat. Unammineq Nuummi Illorsuaq Timersortarfimmi, Godthåb Hallemi arfininngorpat juunip 20-anni ualikkut marlunut aallartissaaq.
Unamminerup aappaani Nunatta U21-ni nunanut allanut unammisartui, Islandip U21-ni nunanut allanut unammisartuinut unammissapput. Unammisartut taakku marluusut tamarmik U21-VM-imut Igitsinimi aggustimi
pisussamut anngutereernikuupput, taamaalilluni unammineq holdit taakku marluk VM-imut piareersarnerattut isigineqarsinnaavoq, Igitsinimilu nunanut allanut unammisaqataarnissat sioqqullugit, kalaallit assammik arsartartuisa qanoq inissisimanerannik takutitsiffiusussaalluni.
Unammineq taanna ataasinngornermi juunip 22-anni unnukkut nalunaaqutaq arfineq-marlunut aallartissaaq, unamminerillu taakku marluk KNR-TV-kkut toqqaannartumik aallakaatinneqassapput.
