Nalimmassaarinikkut inuussutissarsiorneq toqutaassaaq
![](/sites/default/files/styles/image_934x467/public/article_images/vejarbejde_foto_0.jpg?itok=UCyNlENW)
- Assigiinnarpaa, qimuttuitsut ingerlatitsisuat niaquerlugu. Taava nunatsinni aningaasarsiornikkut qimuttuitsut aamarsualersuisussaarutissapput. Taava ajutuussaagut, Kalaallit Nunaanni sulisitsisut peqatigiiffiata siulittaasuata tullia, Martin Ben Shalmi, oqarpoq.
Namminersorlutik Oqartussat ataanni sulisut akissarsiaminnit akileraarutaasa 70 procentii, Naalakkersuisut tigullugit nalimmassaarinermut atorusuppaat, taamaaliornerlu Kommuneqarfik Sermersuumut Qeqqatta Kommunianullu eqquissaaq.
Akileraartartunilli aalajangersimasunik taama taaguusiineq tasisuaarsinnaassaqisoq, Martin Ben Shalmip ernummatigaa. Taannalu isumaqarpoq Naalakkersuisuusarumaartut kommuninit aningaasarissaartunit aningaasat tigusartakkamik amerlassusaat, taamaalillutik allanngorartissinnaagaat.
- Aqqut taanna kimulluunniit iluanngitsuuvoq. Taaguutip "Namminersorluni Oqartussat ataani sulisut" qanoq isumaqarpiarnera nassuiarneqarsinnaanngilaq, Martin Ben Shalmi oqarpoq.
Taassuma tikkuaanera naalakkersuinermi periaatsinik ilinniagallip pisortallu aningaasaqarnerannik Roskildep universitetiani immikkut ilisimasallip Bent Grevep isumaqatigaa. Aningaasarsiornikkut angusarissaariartorneq sakkortuumik eqqugaasinnaasoq, taanna isumaqarpoq.
- Piginneqatigiiffiit akileraarutaannik akissarsianillu akileraarutinik agguaaqqinnissamut akerliusumik tunngavilersuutaavoq, taamaaliornissaq suliffinnut pilerinarsaataasumik inuussutissarsiornermut politikkeqarnissamut kommunit kaammattuutaanngimmat. Taamami nalimmassaarinikkut kommunit angusarissariartortut isertitaasa ilarpassui tiguneqassapput, Bent Greve.
Aningaasat isaasut kommuninit angusarissaariartortunit, tassa kommuneqarfik Sermersuummiit Qeqqata Kommunianiillu, peerneqarnissaat, Sulisitsisut Peqatigiiffianniit ilungersorlutik mianersoqqussutigaat.
- Nuuk tassaavoq angusaqariartorfiusoq, Nuuk suliffinnik aallarnisaaffiuvoq. Suliffeqarfiit inerisimasut Nuummiipput, Kalaallit Nunaanni sulisitsisut peqatigiiffiata siulittaasuata tullia, Martin Ben Shalmi, oqarpoq.
Kommunit akornanni nalimmassaarineq pillugu isumaqatigiissut aggustip aqqarnanni inaarutaasumik suliarineqassaaq.