Nalimmassaanissaq pillugu kommunit isumaqatigiinngillat

Kommunit sisamat aningaasaqarnikkut naligiissarneqarnissaannut aaqqissuusseqqinnissamik pilersaarut pillugu, Aningaasaqarnernut Nunamullu Namminermut Naalakkersuisup, Vittus Qujaukitsup, borgmesterinik sisamaasunik Ilulissani ippassaq ataatsimeeqateqarnera, isumaqatigiissummik inerneqanngilaq.
Allattoq Apollo Jeremiassen
aggustip 06-at 2014 08:41

Ilulissani ataatsimiinnermi nalimmassaanissamut siunnersuut, 56 million koruuninik Kommuneqarfik Sermersuup aningaasaqarneranit tigusisoq, Qeqqata Kommunianillu 12 million koruuninik tigusisoq. Qaasuitsup Kommunianulli 46 million koruuninik tunniussisoq, Kommune Kujallermullu 22 million koruuninik aningaasaqarneranut tunniussisoq. Kommuninit isumaqatigiissutigisinnaasimanngilaat.

AAMMA ATUARUK Aaqqissuusseqqinneq: Asiip utaqqiisaagallartumik aaqqiineq naammagisimaarpaa

Kommune Kujalliup piumasaraa aningaasatigut nalimmassaasoqarnissaa, taamaassappat tamanna Kommuneqarfik Sermersuumut, 175 million koruuninik naleqartussaassagaluarpoq. Kommuneqarfik Sermersuup piumasaraa, Namminersorlutik Oqartussani sulisut akileraarutaasa nalimmassarneqarneri atorunnaarsinneqartariaqartoq.

Kommunit Namminersorlutillu Oqartussat ippassaq ataatsimiinneranni isumaqatigiissutituaasoq tassaavoq, nalimmassaaneq taamaallaat aappaagumut, tassa 2015-mut atuutissasoq.

AAMMA ATUARUK ATAATSIMUT ISIGALUGU Kommunini nalimmassaaneq

Nalimmassaanissamut siunnersuut ilaatigut amigaateqartoq, Aningaasaqarnermut Naalakkersuisup kommuninut qanittukkut allagaqarnermini nassuerutigaa, tamannarpiarlu tassa pillugu nalimmassaaneq taamaallaat aappaagu atuuttussatut ippassaq ataatsimiinnermi isumaqatigiissutaalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq